ஐஸ்பெர்க் காமிக்ஸ் இலங்கையில் ஒரு தமிழ் காமிக்ஸ் -- பாகம் 2

சில வருடங்களுக்கு முன்னராக ஐஸ்பெர்க் காமிக்ஸ் பற்றிய முதலாவது பதிவினை எழுதினேன். ஏனோ தெரியவில்லை, அதன் தொடர்ச்சியை எழுதுவதற்கு மனம் வரவில்லை. எழுத யோசித்தாலும் எதை எழுதுவது என்று தெரியவில்லை. சமீபத்தில் நண்பர் பிரதீப் ஞாபகப்படுத்தினார். சரி பழைய ஞாபகத்தை திரட்டி எழுதுவோம் என்று முடிவெடுத்தேன். என்னுடைய ஞாபக சக்திக்கு ஏற்றவாறு கீழ்கண்ட பதிவை அமைத்துள்ளேன்.

ஐஸ்பெர்க் காமிக்ஸின் முதலாவது பிரதி பெரிய சைசில் 85ரூபாவில் வந்தது. அண்ணாவே இலங்கையிலுள்ள புத்தக கடைகளுக்கு போன் செய்து புத்தகங்களை அனுப்பி வைத்தான். நான் எனக்கும் இதுக்கும் சம்பந்தம் இல்லாத ஆள் மாதிரி "தேமே" என்றிருந்தேன். இரண்டு மூன்று வாரங்கள் கழித்து புத்தக விற்பனை குறித்து விசாரித்தால் வந்த சேதி நல்லதாக இருக்கவில்லை. ஒரு சில புத்தகங்களே விற்றதாக சொன்னார்கள். ஓரிண்டு இடங்களில் விற்பனை பரவாயில்லை ரகம். அதுவும் காமிக்ஸ் பற்றிய ஆர்வமிருந்த விற்பனையாளர்கள் தங்கள் வாடிக்கையாளர்களுக்கு எடுத்து சொல்லி விற்றிருந்தார்கள். நான்கைந்து கடிதங்கள் வந்தன. ஒவ்வொன்றும் இரண்டு மூன்று பக்கத்துக்கு இருந்தன. தீவிர காமிக்ஸ் ரசிகர்கள் ஐஸ்பெர்க் காமிக்சை வரவேற்றனர். அவர்களது கடிதங்களே அடுத்த புத்தகத்துக்கான முயற்சிக்கான டோனிக்காக அமைந்தது. ஆனாலும் எப்படி புத்தகங்களை மார்கெட் செய்வதோ என்று தெரியாமல் தடுமாறினோம். காமிக்ஸ் வாசிக்கும் குறிப்பிட்ட வட்ட வாசகர்களுக்கு எவ்வாறு விளம்பரப்படுத்தலாம் என்றும் தெரியவில்லை.

அப்போதுதான் இன்டர்நெட் என்கிற சமாச்சாரம் ப்ரௌசிங் சென்டர்கள் மூலமாக எங்கள் பிரதேசங்களை ஆக்கிரமித்திருந்த சமயம். அண்ணாவும் ஒரு IT ஆசாமி என்பதால் ஐஸ்பெர்க் காமிக்ஸுக்காக ஒரு வெப்சைட் உருவாக்கிடுவதாக முடிவெடுத்தான். நானும் அப்போதுதான் வெப் ப்ரோக்ராம்மிங் பற்றி படித்திருந்தேன். ஆகவே ஒரு நல்ல நாளில் ஐஸ்பெர்க் காமிக்ஸ் வெப்சைட் உதயமானது. வெப்சைட்டை உருவாக்கி ஒரு "டிஸ்கஸன் போரம்" வைத்தோம். அதில் ஐஸ்பெர்க் காமிக்ஸ் சம்பந்தமான அறிவிப்புகளை செய்தோம். இந்த வெப்சைட் மூலமாகத்தான் கடல் கடந்த இந்திய காமிக்ஸ் நண்பர்களின் தொடர்பு ஏற்பட்டது. எங்களது "டிஸ்கஸன் போரம்" காமிக்ஸ் நண்பர்கள் கூடி பழைய அனுபவங்களை விவாதிக்கும் திண்ணையாக தொழிற்பட்டது. இலங்கை நண்பர்களின் வருகையை விட இந்திய காமிக்ஸ் ஆர்வலர்களின் வருகை அதிகம் என்பதுதான் உண்மை. அக்காலத்தில் இன்டர்நெட் என்பது இலங்கையின் எல்லா பகுதிக்கும் சரியாக பரவவில்லை என்பது காரணமாக இருந்திருக்கலாம்.

ஐஸ்பெர்க் காமிக்ஸ் வெப்சைட் மூலமாக இந்திய காமிக்ஸ் ரசிகர்களான ரகு மற்றும் விஸ்வா ஆகியோரின் அறிமுகம் கிடைத்தது. அவர்களின் வேண்டுகோளுக்கிணங்க சில காமிக்ஸ் பிரதிகளை இந்தியாவுக்கு அனுப்பினோம். 2007ஆம் ஆண்டளவில் ரகு என்கிற ராகுலன் என்ற அந்த நண்பர் தாங்களும் புதிதாக காமிக்ஸ் வெளியிட இருப்பதாக சந்தோஷ செய்தியை அறிவித்தார். அவரும் சில காமிக்ஸ் நண்பர்களும் இணைந்து "ஸ்டார் காமிக்சை" தொடங்கியிருந்தார்கள்.

முதல் இதழை எங்களுக்கு அனுப்பினார்கள். அதன் தரம் ஆங்கில பதிப்புகளின் தரத்தில் அட்டகாசமாக இருந்ததை கண்டு வியந்தேன். "பனி மலைக்கோட்டை" என்ற கேப்டன் பிரின்ஸ் தோன்றும் சாகசத்தை முதன்முறையாக வாசித்து ரசித்தேன். முதன்முறையாக ஹார்ட் பைண்டிங்கில் ஒரு தமிழ் காமிக்ஸை கண்டேன். ஏதோ ஒரு காரணத்தினால் "ஸ்டார் காமிக்ஸ்" பின்னர் வெளிவரவில்லை. ஆனாலும் என்னை பொறுத்தவரை அந்த இதழ் தமிழ் காமிக்ஸ் உலகில் ஏற்படுத்திய தாக்கம் முக்கியமானது என்றே தோன்றுகின்றது.

விஸ்வா அப்போதே எங்கள் காமிக்ஸ் பற்றிய விமர்சனங்களை வழங்கி அதீத ஆதரவு தந்தார். அவரது ப்ளாக்போஸ்டுகள்தான் ஐஸ்பெர்க் காமிக்ஸ் இருந்ததற்காக ஆதாரங்களாக உள்ளன. இப்போது இந்த போஸ்டுக்கான படங்களை அங்கிருந்தே உருவியுள்ளேன். இவ்வாறான ப்ளாக்போஸ்ட்கள் மற்றும் நீளமான கடிதங்கள் அடுத்தடுத்த புத்தகங்களை வெளியிட உந்துதல் அளித்தன என்பது நிச்சயம்.

முதலாவது இதழின் பின்னராக இரண்டாம் இதழுக்கான வேலைகளை அண்ணா தொடங்கினான். முதலிரண்டு புத்தகங்களுக்காக ஏற்கனவே ரோயல்டி கட்டணங்கள் கட்டி விட்டதால் இரண்டாம் புத்தகத்தை உடனடியாக வெளியிட வேண்டிய கட்டாயம். முதல் இதழைப்போலவே இரண்டாம் இதழுக்கும் ஆங்கில பதிப்பு எங்களிடம் இருந்ததால் மொழிபெயர்ப்பு எளிதாக இருந்தது. ஆனால் இம்முறை நானும் மொழிபெயர்ப்பில் உதவினேன். இப்போது அந்த புத்தகத்தை பார்க்கும்போது பல இடங்களில் சொதப்பியிருப்பதை உணரமுடிகின்றது. முதல் புத்தகம் பெரிய சைசில் ஜரூராக 85ரூபா விலையில் வந்தது. விற்பனை மந்தத்திற்கு விலையின் உச்சம் காரணமாக இருக்கலாம் என்று அண்ணா கருதினான். அதனால் இரண்டாம் புத்தகம் 50ரூபா விலையில் வழமையான சின்ன சைஸுக்கு மாற்றப்பட்டது. இம்முறையும் அண்ணாவே விற்பனையாளர்களுக்கு அனுப்பிவைத்தான்.

இலங்கை முழுவதுக்குமாக XIIIஇன் உரிமை வாங்கப்பட்டிருந்தாலும் அதனை ஐஸ்பெர்க் காமிக்ஸ் அதனை சரியாக பயன்படுத்தியிருக்கவில்லை. குறிப்பாக சிங்களம் இலங்கையில் எழுபது சதவீத மக்களின் மொழி, ஆகவே அதில் வெளியிடும் யோசனையை அண்ணா சொன்னான். எங்களுக்கு சிங்களம் சுத்தமாக தெரியாது. ஆகவே ஒரு சிங்களம் படிப்பிக்கிற ஒரு மாஸ்டரின் உதவிகொண்டு மொழிபெயர்ப்பதாக ஏற்பாடு. சில நாட்களில் ஆர்வமாக தமிழை சிங்களத்தில் மொழிபெயர்த்து தந்துவிட்டார். ஆனால் அவர் என்னத்தை எழுதியிறுக்கிறாரோ... அது சிங்கள காமிக்ஸ் ரசிகர்களிடம் எடுபடுமா என்று தலையை பிய்த்துக்கொண்டோம். எனது சிங்கள நண்பர்களிலே காமிக்ஸ் வாசிக்கும் நண்பனிடம் சிங்கள மொழிபெயர்ப்பு ப்ரூப் காமிக்ஸை கொடுத்து வாசிக்குமாறு சொன்னேன். இரண்டு நாளைக்கு பிறகு வந்த அவன் இந்த மொழிபெயர்ப்பு சரிவராது. சிங்கள காமிக்ஸ் பேச்சுவழக்கில் எழுதுவார்கள். ஆனால் இது எழுத்து வழக்கில் போர்மலா இருக்கு. இது எடுபடும் என்று தோணலை என்று கை விரித்தான். சரியான மொழிபெயர்ப்பாளர் இல்லாததால் சிங்கள காமிக்ஸ் ஐடியா கைவிடப்பட்டது.

இன்சைடர்ஸ் விளம்பரம்

அது அவ்வாறு போய்கொண்டிருக்க தமிழ் காமிக்ஸின் அடுத்த இதழுக்கு என்ன செய்வது என்ற யோசனை தலையிலேறியது. XIIIக்கு பிறகு யார் என்ற கேள்வி எனக்கு எப்பவுமே இருந்தது. அண்ணாவோ தோர்கல், அல்டேப்ரன் என்ற வேற்றுகிரகக்கதை, இன்சைடர்ஸ் என்ற பெண் உளவாளியின் சாகசம் என்ற பெரிய லிஸ்ட் ஒன்று வைத்திருந்தான். ஆனால் அந்நியமான கதைகளை தொடுவதில் பல சிக்கல்கள் இருந்தன. அவர்கள் அனுப்பிய சாம்பிள்கள் பிரெஞ்சு மொழியிலிருந்தன. படம் பார்த்து கதையின் தரத்தை மதிப்பிடுவது சிரமம் என்றே புரிந்தது. உதாரணமாக பவுண்சரின் முதலாம் பாகமும் அவர்கள் அனுப்பிய சாம்பிள்களில் இருந்தன. ஆனால் அக்கதையின் படங்கள் கவர்ந்தாலும் சிக்கலான கதையின் போக்கு பிடிபடவில்லை. ஆனால் தமிழ் ரசிகர்களுக்கு பரிச்சயமான "கேப்டன் டைகர்" என்று அறியப்படும் ப்ளுபெரியை அறிமுகப்படுத்துவது என்று தீர்மானித்தோம். ஆனால் இதுவரை தமிழில் வராத கதைகளை கதைகளை தேடினோம். அப்போது இளமைக்கால டைகர் கதைகளை முத்து  காமிக்ஸ் வெளியிட்டிருக்கவில்லை. ஆகவே அக்கதைகளை தெரிவுசெய்தோம்.

வாஸ்கோ கதையின் விளம்பரம்

ஒரு நல்ல நாளில் Dargaud நிறுவனத்திலிருந்து சாம்பிள் புத்தகம் வந்திறங்கியது. அதற்கான ஆங்கில மொழிபெயர்ப்பு சாம்பிள்கள் இல்லையென கையை விரித்துவிட்டனர். அப்போதுதான் தொடங்கியது சங்கடம். விசாரித்து பார்த்தபோது பிரெஞ்சு மொழிபெயர்ப்பு கொழும்பில் செலவு கூடின விஷயம் என்ற உண்மை தெரிந்தது. வழமையாக ஓரிரண்டு பக்கங்கள் மட்டுமே மொழிபெயர்க்கும் அவர்கள் இருபத்தைந்து முப்பது பக்கங்கள் மொழிபெயர்ப்பதற்கு யானை விலை குதிரை விலை சொன்னார்கள். அப்போதுதான் அண்ணாவின் சாப்ட்வேர் மூளை வேலைசெய்தது. "கூகிள் டிரான்ஸ்லேடர்" மூலமாக மொழிபெயர்க்கலாம் என்றான். கதையில் பக்கபக்கமாக வரும் வசனங்களில் முதலில் ஒரு நண்பரின் உதவிகொண்டு டைப் செய்து எடுத்தோம். பின்னர் அதனை "கூகிள் டிரான்ஸ்லேடர்"ல் மொழிபெயர்த்தேடுத்தோம். "கூகிள் டிரான்ஸ்லேடர்" தனது ஆரம்ப காலங்களில் ஓரளவுக்குத்தான் மொழிபெயர்க்கும். ஆகவே ஆங்கிலத்தில் டிரான்ஸ்லேட் ஆன சமாச்சாரம் கொஞ்சம் விளங்கியது. குறிப்பாக ப்ளுபெரி லோங் சாம் என்ற தப்பியோடிய அடிமையுடன் கதைக்கும் வசனங்கள் பிரெஞ்சு கிராமீய வட்டார வழக்கு மொழியில் இருந்ததால் "கூகிள் டிரான்ஸ்லேடர்" அநியாயத்துக்கு திணறியது. அந்த பக்கோடா வசனங்களுடன், படங்களையும் பார்த்து, கதையோட்டத்திற்கு ஏற்றவாறு வசனங்களை தீர்மானித்தோம். அதனை மொழிபெயர்ப்பது வினோதமான சவாலாகவிருந்தது.

இது இப்படி போய்கொண்டிருக்க அண்ணா செய்த ஒரு காரியம் எனக்கே வியப்பளித்தது. இனிமேல் இப்படி பிரெஞ்சு மொழிபெயர்ப்புக்கு திணறுவதை காட்டிலும் பிரெஞ்சு படித்துவிடலாம் என்று அண்ணா முடிவு செய்தான். ஆனால் இரண்டு மூன்று கிளாஸ் போய்விட்டு முழிபிதுக்கியவாறு வீடு திரும்பினான். "என்னடா சோதனை இது. பிரெஞ்சில் கதிரை மேசைக்கெல்லாம் ஆண்பால் பெண்பால் பாக்கிறாணுக" என்று அலுத்துக்கொண்டான். காமிக்ஸ் மேல் அவனுக்கிருந்த பற்று அவனை பிரெஞ்சு க்ளாஸுக்கு கொண்டு போய் விட்டது. அவனும் சலிக்காமல் சில க்ளாஸுக்கு போனான். அவனை மாதிரி ஒரு காமிக்ஸ் வெறியனை கண்டதில்லை.

ப்ளுபெரியின் பெயர் வந்த காரணம்

இரண்டாம் இதழைபோலவே ப்ளுபெரியின் சாகசமும் அம்பது ரூபாயில் விற்பனைக்கு அனுப்பப்பட்டது. விற்பனையின் பின்னராக சில கடிதங்கள் வந்தன. ஆனால் விற்பனை அவ்வளவு முன்னேற்றமில்லை. வெறும் இருபது லட்சம் தமிழர்கள் வாழும் நாட்டில் காமிக்ஸ் என்ற ஊடகம் சென்றடைய வேறு லெவலில் முயற்சி செய்ய வேண்டும் என்பது புரிந்தது. 2007ஆம் ஆண்டு காலப்பகுதியில்தான், நிழல் உள்நாட்டுப்போர் நிஜமாக உருமாற தொடங்கியிருந்தது. போரின் தாக்கம் காரணமாக நாட்டின் ஏனைய பகுதிகளுக்கான தொடர்பு பாதிக்கப்பட்டது. கிளிநொச்சிக்கும் 50 புத்தகங்கள் அனுப்பினோம். அதன்பிறகு அதைப்பற்றி கேட்கத்தோன்றவில்லை. பணம் வராததற்கு வெவ்வேறு நியாயமான காரணங்கள் இருந்தன. அப்போதுதான் நாட்டில் சமாதான பேச்சுகள் முடிந்து போர் உத்தியாகபூர்வமாக அறிவிக்கப்பட்டது. அதன்பிறகு வளைக்குள் பதுங்கிய எலிகளாணோம். கொழும்பில் பாதுகாப்பு பலப்படுத்தப்பட்டது. எங்கள் வாழ்க்கைமுறையே மாறிப்போனது. காமிக்ஸ் வெளியிடும் யோசனையே வரவில்லை. ஏதோ சின்ன வயசு ஆசைக்கு மூன்று புத்தகமே அதிகமோ என்று தோன்றியது. இப்போதுகூட ஏதாவது ஒரு ஆங்கில காமிக்ஸை வாசிக்கும்போது தமிழில் வெளியிடுவோமா என்று ஆசை வருவது உண்மைதான். அதற்கு காலம் பதில் சொல்லலாம்.

படங்கள் பின்வரும் நண்பர்களின் தளங்களிருந்து சுடப்பட்டன. நன்றி...
http://tamilcomicsulagam.blogspot.com/
http://www.comicology.in/



http://www.comicology.in/2007/08/star-1-captain-prince-april.html
http://tamilcomicsulagam.blogspot.com/2008/09/iceberg-comics-srilankan-tamil-1st.html
http://tamilcomicsulagam.blogspot.com/2008/09/iceberg-comics-2nd-issue-xiii.html
http://tamilcomicsulagam.blogspot.in/2008/09/icerberg-comics-3rd-issue-blueberry.html?m=1

ஊழிகாலத்தில் ஒரு காமிக்ஸ் வேட்டை

1997ஆம் ஆண்டளவில் நான் எட்டாம் வகுப்பு படித்துக்கொண்டிருந்தேன். காமிக்ஸ் படிப்பற்காகவே பள்ளிக்கூடம் போன காலம். பள்ளிக்கூடத்தில் காமிக்ஸ்களை கைமாற்றிக்கொள்வோம். சமூகக்கல்வி பாடம் நடக்கும்போது மாயாவியின் "தலையில்லா கொலையாளி" பாக்கெட் சைஸ் புத்தகம் எனது சமூககல்வி புத்தகத்துக்கு நடுவே இருக்கும். எங்களிடம் இருக்கும் காமிக்ஸ் புத்தகங்களை கைமாற்றிகொள்வோம். பாடசாலை நேரத்திலேயே வாசித்துவிட்டு கொடுத்துவிட வேண்டும். வீட்டுக்கு கொண்டு செல்ல அனுமதியில்லை. இதற்காகவே நான், சிவா, கிச்சா என்கிற கிருஸ்ணா, அச்சா என்ற அச்சுதன் ஆகியோர் கடைசி வரிசையில் இருப்போம். கணித டீச்சர் முக்கால்வாசி நேரம் ப்ளாக் போர்டை பார்த்தே பாடம் படிப்பிப்பா. நாங்களும் சீரியஸாக கணித புத்தகத்தை பார்ப்பது போல ஒரு பீரியட்டில் 25 பக்கம் காமிக்ஸ் வாசித்துவிடுவோம். இதற்காகவே தவறாமல் ஒவ்வொரு நாளும் பாடசாலைக்கு போவேன். பள்ளிக்கூடம் போக அடம்பிடிக்கிற பயல் திடீரென்று ஒழுங்கா போறானே என்று அம்மாவுக்கு ஒரே ஆச்சர்யம்.

அப்போது சண்டை கடுமையாக நடந்த நேரம். இந்தியாவிலிருந்து அநேக நேரங்களில் படகினில் வரும் ஏனைய பொருட்களுடன் சில புத்தகங்களும் வந்திறங்கும். ஆனால் சில மாதங்களாக கடலில் அடிக்கடி சண்டை நடந்தது. இந்தியாவிலிருந்து ஒரு சாமானும் வரவில்லை. இதனாலேயே எங்கள் பகுதிக்கு காமிக்ஸ் வறட்சி. பருத்திதுறையிலிருக்கும் புத்தககடைக்கு வாரத்துக்கு ஒருமுறை சைக்கிள் மிதித்து தோல்வி கண்டோம். இதற்கு மேல் என்ன செய்வது கடுமையான சிந்தனையிலிருந்தோம். சிவா பள்ளிகூடத்துக்கு அடிக்கடி "கட்" அடிக்க ஆரம்பித்தான். கேட்டால் "பள்ளிகூடத்துக்கு வந்து என்னதான் செய்யிறது" என்பான். ஆண்கள் பாடசாலை வேறு. பள்ளிக்கூடம் போரடிக்க ஆரம்பித்தது.

இப்படியாக போன காலப்பகுதியில், கிச்சா ஒரு நல்ல மழைநாளில் வினோத தகவலுடன் வந்தான். யாழ்ப்பாண டவுணுக்கு அருகிலுள்ள ஒரு பழைய லைப்ரரியை மூடபோகிறார்களாம். அதிலுள்ள புத்தகங்களை எல்லாம் விற்பதாக இருக்கிறார்களாம். என்பதுதான் அந்த தகவல். அதில் பழைய காமிக்ஸ்கள் இருக்குமோ? என்பதுதான் எங்களுக்கான மில்லியன் டொலர் கேள்வி. இந்த தகவலை கிச்சாவுக்கு சொன்னது அவன்ட மாமா. அவருக்கே யாரோ ஒரு கூட்டாளி சொன்னாராம். சும்மா காதுவழியா வந்த செய்திதான். புத்தகங்கள் முடிந்து விட்டனவா என்று தெரியாது. மேலதிக தகவலை கேட்டு உறுதிபடுத்த ஒருவழியும் இல்லை. போதாக்குறைக்கு யாழ்ப்பாண டவுண் எங்கள் ஊரிலிருந்து பதினாறு மைல் தூரம். போறவழி முழுக்க ஆமிகாரன்ட செக்பொயிண்டுகள். இறக்கி ஏத்தி குசலம் விசாரிப்பானுக. டவுணுக்கு போய் வர ஒரு நாள் முழுக்க போகும். போதாக்குறைக்கு அந்த காலத்துல யாரும் அவ்வளவு தூரம் போக மாட்டார்கள். வழியில் எதுவும் நடக்கலாம். ஆகவே எங்கள் காமிக்ஸ் கனவுகளை பெரிய பூட்டுபோட்டு பூட்டி விட்டு வேற வேலையை பார்த்தோம்.

இப்படியாக ரெண்டு நாட்கள் கழிந்தன. அன்று மத்தியானம் ஒருமணி இருக்கும். கடைசிப்பாடம் நடந்துகொண்டிருந்தது. இங்க்லீஷ் வாத்தியார் அரைமயக்க நிலையில் சலிப்புடன் பாடம் நடத்திக்கொண்டிருந்தார். நாங்களும் தேமே என்று கேட்டுகொண்டிருந்தோம். அச்சா நல்ல நித்திரையில் தூங்கி வழிந்தான். நானும் கிச்சாவும் அவன் எப்போது கீழே விழுவான் என்று ஆர்வமாக பார்த்துக்கொண்டிருந்தோம். அப்போது திடீரென்று அச்சா விழித்துக்கொண்டான். என் காதில் "டேய் நாளைக்கே டவுணுக்கு போவோம். அந்த லைப்ரரியில் நமக்கு காமிக்ஸ் புத்தகம் கிடைக்கிறதா கனாகண்டேன்" என்றான். அரைநித்திரையில் ஏதோ உளறுகிறான் என்று நினைத்துக்கொண்டேன். "டேய்! நான் வகுப்பறையில் கண்ட கனவெல்லாம் பலிச்சிருக்கு. நிச்சயமா இதுவும் பலிக்கும்" என்றான் உறுதியாக.

பள்ளிக்கூடம் முடிந்தபின்னர் ஆலமரத்துக்கு கீழே திட்டமிடலை ஆரம்பித்தோம். அடுத்த நாளே யாழ்ப்பாணம் போவதாக ஏகமனதாக தீர்மானம் மேற்கொள்ளப்பட்டது. அச்சா முன்னின்று திட்டங்கள் வகுத்தான். அடுத்த நாள் காலை பள்ளிக்கூடத்துக்கு போவது போல் வெளிக்கிட்டுகொண்டு வந்து அப்படியே  "தட்டி வானில்" டவுணுக்கு போவோம் என்று நான் யோசனை சொன்னேன். பதினாறு மைல் சைக்கிள் மிதிக்க எனக்கு விருப்பமேயில்லை. அச்சா "டேய்.. பள்ளிகூட உடுப்போட வானில ஏறினா யாராவது பார்த்து என்ட அப்பாவிடம் சொல்லிட்டா என்னை பெல்டாலை வெளுத்து போடுவார். சைக்கிள்ள போனா அவ்வளவு சந்தேகம் வராது. பள்ளிக்கூடம் முடியுற நேரத்துக்குள்ளே திரும்பி வந்திட்டா போதும், ஒருத்தருக்கும் சந்தேகம் வராது". உண்மைதான் எங்கள் ஊர் ஒரு வினோதமான ஊர். ஊர் முழுக்க அம்மா, அப்பாவின் சொந்தக்க்காரர்களோ நண்பர்களோ பரவியிருப்பார்கள். இப்படித்தான் இரண்டு மாதத்திற்கு முன்னால, ஒன்றுவிட்ட பெரியப்பா ஒருவர் வீட்டுக்கு வந்திருந்தபோது, "உங்க மகன் பள்ளிக்கூடம் முடிச்ச பிறகு கேள்ஸ் ஸ்கூலுக்கு முன்னால நிற்கிறதை கண்டேன். கொஞ்சம் கண்டிச்சு வையுங்க" என்று அப்பாவிடம் தகவல் சொன்னார். அப்பாவிடம் அடி வாங்காத குறைதான். விசாரணை என்ற பெயரில் துளைத்தெடுத்துவிட்டார். எங்கள் ஊர் முழுக்க உளவாளிகள் பரவிக்கிடந்தனர். ஊரின் வடக்குப்பக்கம் அப்பாவின் சைட் சொந்தக்காரர்கள். தெற்குப்பக்கம் அம்மாவின் சைட் சொந்தக்காரர்கள். அவர்களின் கழுகு கண்களிலிருந்து தப்புவது கஷ்டம்தான். காமிக்ஸ் வாங்க யாழ்ப்பாண டவுணுக்கு போனேன் என்று தெரிந்தால் அம்மா தோலை உரித்துவிடுவாள். நான் தவணை டெஸ்ட்டுகளில் எடுக்கும் மார்க்குகளுக்கும் நான் வாசிக்கும் புத்தகங்களின் எண்ணிக்கைக்கும் ஏதோ தொடர்ப்பிருப்பதாக ஒரு தியரி சொல்லுவாள். அதனால் விஷயம் ரகசியமாக இருக்கவேண்டும்.

அடுத்த நாள், காலை நேரத்துக்கே விழித்துக்கொண்டேன். வழமையாக ஏழரை மணிக்கு பள்ளிக்கூடத்துக்கு போகும் நான் அன்று ஏழே காலுக்கே வெளிக்கிட்டேன். "அண்ணா! என்ன இன்றைக்கு மட்டும் நேரத்துக்கு போறே" என்றாள் தங்கச்சி. உண்மைதான், பதட்டத்தில் நேரத்துக்கே வெளியே வந்துவிட்டேன். தங்கச்சி அம்மாவோட கையாள். நான் படிக்கும் நேரத்தில், காமிக்ஸ் வாசித்தால் அம்மாவிடம் போட்டு கொடுக்கும் உள்நாட்டு உளவாளி. நான் சுதாரித்தவாறே "இன்றைக்கு நான் வகுப்பறை க்ளீன் பண்ற டேர்ன்" என்று சொல்லிவிட்டு சைக்கிளை மிதித்தேன். சிவா, அச்சா, கிச்சா எல்லோரும் சரியாக ஏழரைக்கு பள்ளிக்கூடம் முன்னால் ஆஜர். பெரிய போத்தல்களில் தண்ணீர் அள்ளிக்கொண்டோம். முகத்தில் பெரிய பரபரப்பு காட்டாமல் ஒருவர் போய் இரண்டு நிமிடம் கழித்து மற்றவர் என்று மெதுவாக ஊருக்கு வெளியே சென்றோம். சன்னதி கோவிலுக்கு கிட்டே வைத்து எல்லோரும் இணைந்து கொண்டோம். சன்னதி கோவில் போகும் வரையிலும் ஊர் உளவாளிகள் நிறைந்திருந்தார்கள். ஆகவேதான் இப்படி ஒரு ஏற்பாடு. எனக்கு அப்போதே இளைக்க ஆரம்பித்து விட்டது. கிச்சா போன ஸ்போர்ட்ஸ்மீட்டுக்கு வாங்கி மிஞ்சிய குளுகோஸ் பக்கட்டுகளை பள்ளிகூடத்திலிருந்து லவட்டி கொண்டு வந்திருந்தான். அதை வாயில் கொட்டி தண்ணீரை குடித்தேன்.

அச்சுவேலிக்கருகில் இரண்டாம் நிறுத்தம். கடையில் மாம்பழ டொபி வேண்டினோம். கையில் இருந்த காசுகளை எண்ணிப்பார்த்தோம். மொத்தமாக இருநூற்றி பன்னிரெண்டு ரூபா. சிவா மட்டுமே எண்பத்தைந்து ரூபா போட்டிருந்தான். என்னுடைய பங்கு நாப்பத்திரண்டு ரூபா மட்டும்தான். குறைந்தது இருபது புத்தகமாவது வாங்கிவிடலாம் என்று கணக்கு போட்டோம். மீண்டும் சைக்கிளோட்டத்தை ஆரம்பித்தோம். ஆமி செக்பொய்ண்டுகளில் சைக்கிளை உருட்டினோம். "எங்க போறே" என்று விசாரித்தான் ஒரு ஆமிக்காரன். "டவுண் ஸ்கூலில் எக்சிபிஷன்" என்றேன். ஒருமாதிரியா பார்த்தான். என்ன நினைத்தானோ தெரியவில்லை. "சரி போ" என்றான். என்னுடைய பள்ளிகூட அடையாள அட்டையை பார்த்தால் என்னை போக விட்டிருப்பானோ.. என்னவோ..! அவ்வளவு தூரத்திலிருந்து எக்சிபிஷன் பார்க்கவாறது பல சந்தேகங்களை தோற்றுவிக்கலாம்.. பள்ளிகூட சீருடைக்கு ஒரு மரியாதை இருக்கத்தான் செய்கிறது.

அந்த லைப்ரரி கள்ளியங்காட்டுக்கு பக்கத்தில் இருப்பதாக மட்டுமே தகவல். பத்து மணியளவில் டவுணுக்கு போய் சேர்ந்தோம். கள்ளியங்காட்டு சந்தியில் உள்ள தேத்தண்ணி கடைகளில் லைப்ரரியை பற்றி விசாரித்தோம். ஒருவருக்கும் அதைப்பற்றி தெரிந்திருக்கவில்லை. சரியான தகவலில்லாமல் கிளம்பி வந்த முட்டாள்தனத்தை எண்ணி மனம் நொந்தோம். சிவா "என்னால் இனிமே சைக்கிள் ஓட முடியாதுடா. கால் எல்லாம் நோவுது" என்றான். வெயிலின் கொடுமை தாங்கவில்லை. சந்தியில் இருந்த மரத்தின் கீழ் ஓய்வெடுத்தோம். எங்கள் எல்லோரின் தலையும் கவிழ்ந்திருந்தது. கிச்சா மட்டும் கொஞ்சம் யோசனையிலிருந்தான். அரை மணித்தியாலமாக அதிலேயே காத்திருந்தோம். அப்போது கிட்டத்தட்ட எங்கள் வயதில் ஸ்கூல் சீருடையுடன் ஒரு பொடியன் சைக்கிளில் போய் கொண்டிருந்தான். கிச்சா அவன் அவனை சைக்கிள் முன்னால் பாய்ந்து மறித்தான். அவனிடம் விசாரித்ததில் ஏதோ ஒரு சின்ன வீதியின் பெயரை சொன்னான். புதிய உத்வேகத்துடன் சைக்கிள் ஓடினோம். "அங்கே 'பழி வாங்கும் புயல்' புத்தகம் இருந்தா அது எனக்குத்தான்" என்று முன்பதிவு செய்தான் சிவா. அச்சா "முதல்ல அந்த லைப்ரரியில காமிக்ஸ் இருக்கோணும் என்று கடவுளை வேண்டிக்கொள்" என்று முறைத்தான். நான் கொடுத்த நாற்பது சொச்சம் ரூபாவுக்கு என்ன புத்தகம் கிடைக்குமோ தெரியவில்லை என்று யோசித்துக்கொண்டேன்.

ஒருவாறாக லைப்ரரியை வந்தடைந்தோம். சின்ன லைப்ரரிதான். ஒரு வயதான நபர் எங்களை முறைத்துபார்த்தார். பள்ளிக்கூட நேரத்தில் பள்ளிக்கூட சீருடையுடன் வந்ததை அவர் ரசிக்கவில்லை. "என்ன தம்பிகளா. இந்த நேரத்தில நீங்க வரக்கூடாது" என்றார். அவர் பேச்சிலேயே அவர் மென்றுகொண்டிருந்த வெற்றிலையின் காரமிருந்தது. அச்சா கொஞ்சம் தைரியத்தை வரவழைத்துக்கொண்டு "ஐயா! நாங்க பருத்துறை பக்கமிருந்து வாரோம். இந்த லைப்ரரியில புத்தகங்கள் விக்கிறீங்களா. இந்த லைப்ரரியை மூடப்போறதா யாரோ சொன்னாங்க" என்று இழுத்தார். அவர் எங்களை மேலும் கீழுமா பார்த்தார். "என்ன புத்தகங்கள் வேணும். நிறைய புத்தகங்கள் முடிஞ்சு போச்சு. அந்த செல்புல இருக்கிற புத்தங்கள்தான் மிச்சம்" என்று சலிப்புடன் கூறினார். எங்கள் எல்லோரது இதயமும் "தடக்.. தடக்.." என்று அடித்துக்கொண்டது. இரத்தம் சூடாக உடல் முழுக்க பரவியது. கிச்சா கண்ணை மூடி கடவுளை வேண்டிக்கொண்டான். அச்சா மெதுவாக முன்னோக்கி நடை போட்டான். புத்தகங்கள் வரிசையில் அடுக்கப்பட்டிருக்கவில்லை. ஒவ்வொரு புத்தகமாக எடுத்துப்பார்த்து சலித்தோம். "டேய் ஒரு காமிக்ஸ்கூட இல்லடா" என்று அழாக்குறையாக அச்சா கூறினான். எல்லா தெய்வங்களும் ஒன்றுசேர்ந்து எங்களுக்கு எதிராக சதி செய்ததை போல உணர்ந்தோம்.

"என்ன தம்பி ஒரு புத்தகமும் எடுக்கலையா" என்றவாறு அந்த பெரியவர் வந்தார். "எங்களுக்கு காமிக்ஸ் வேணும் ஐயா" என்று தீனமான குரலில் கூறினேன். "அதுவா! அதுவும் கொஞ்சம் இருக்கு. அதை அந்த மூலையில் தனியா போட்டு வச்சிருக்கு" என்றார். அவர் காட்டிய திசையில் மூன்று நான்கு கட்டுகளாக காமிக்ஸ்கள் இருந்தன. ஒரே நேரத்தில் எங்கள் கண்களில் ஒளி வந்தது. ஒரு சிலிர்ப்புடன் புத்தகங்களை பார்வையிட்டோம். கடைசி பத்து வருஷங்களில் வந்த ஒருசில புத்தகங்கள் அழகாக பைண்டிங் செய்யப்பட்டு எங்களை பார்த்து கண்ணை சிமிட்டின. "பழி வாங்கும் புயல்" இருந்தது. நார்மனின் "மரணத்தின் நிழலில்"  புத்தகத்தை நான் எடுத்துக்கொண்டேன். ஆளுக்கு ஏழெட்டு புத்தகங்களுடன் ஐயாவின் முன்னுக்கு நின்றோம். எல்லா புத்தகங்களுக்கும் அதன் தடிப்பை வைத்து ஒரு விலையை நிர்ணயித்தார். மொத்தமாக முன்னூற்றி எழுபது ரூபா வந்தது. எங்களிடம் இருந்த காசுக்கு இதை வாங்க முடியாது. அச்சா தயங்காமல் தனது வாட்ச்சை தூக்கி பெரியவரிடம் கொடுத்தான். பெரியவர் "என்ன தம்பி இதுக்கு போய் நல்ல கசினோ வாட்ச்சை தாறீங்க. இவ்வளவு தூரம் மினக்கெட்டு வந்திருக்கிறீங்க, இவ்வளவு காசு போதும்" என்று சிரித்தார். வாட்ச்சை திரும்பி தந்துவிட்டு கொடுத்த இருநூறு சொச்சம் ரூபாவுக்கே எல்லா புத்தகங்களையும் தந்துவிட்டார். வெளியே வந்தோம். கால்கள் தரையில் படாதது போன்றதொரு சிலிர்ப்பான அனுபவம்.

மணி பன்னிரெண்டரை. பள்ளிக்கூடம் முடிவதற்கு இன்னமும் ஒரு மணித்தியாலமே இருந்தது. வேகமாக சைக்கிள் மிதித்தாலும் போய் சேர்வது கஷ்டம் என்பதை அப்போதுதான் உணர்ந்தோம். சைக்கிளில் சிட்டாக பறந்தோம். "லேட்டாக போனதற்கு காரணமாக பள்ளிக்கூடத்தில் கிரிக்கெட் விளையாடியதாக சொல்லி சமாளிக்கலாம்" என்றான் சிவா. வல்லைவெளி பிரதேசத்தில் நுழையும்போது காற்று சோதனை தந்தது. அதைவிட பெரிய சோதனை காத்திருக்கும்போது அது பெரிதாக தோற்றவில்லை. சன்னதி கோவிலடியில் எல்லோரும் தனித்தனியாக பிரிந்தோம். ஒருவாறாக இரண்டரைக்கு வீட்டுக்கு போய் சேர்ந்தேன். வீட்டுக்குள்ளே நுழையும்போதே அம்மா வாசலில் நின்றாள். "ஐயா எங்க போய்ட்டு வாரீங்க. பள்ளிகூடம்தான் போனீங்களா" என்று முறைத்தாள்.

சன்னதி கோவிலுக்கு போன அம்மாவின் யாரோவொரு சிநேகிதி எங்களை பார்த்து வீட்டில் சொல்லிவைக்க விஷயம் வீட்டுக்கு தெரிந்து விட்டது. அப்பா வீட்டுக்கு வந்தபிறகு பூசை ஆரம்பித்தது. அப்பா அடித்து களைத்த பின்னர்தான் கேட்டார். "அப்படி நாள் முழுக்க எங்கடா போனே" என்றார். உண்மையை சொன்னேன். அதிர்ந்து போனார். "முதல்லேயே சொல்ல வேண்டியதுதானே. சொல்லியிருந்தா நானே வேண்டி தந்திருப்பேனே" என்று சொன்னது இந்த கதைக்கு ஒவ்வாத அன்டி-கிளைமாக்ஸ். அவரும் ஒரு காமிக்ஸ் ரசிகர்தான்.

********************

இது வெறும் கற்பனை கதைதான். காமிக்ஸ் வேட்டையாடி சலிக்கும் நண்பர்களுக்கு சமர்ப்பணம்.

அமெரிக்க காமிக்ஸ்கள் : சில Batman கதைகள்

சமீபகாலமாக அமெரிக்கத்தனமான Batman கதைகளை ஆங்கிலத்தில் வாசிக்க முயற்சிக்கிறேன். இன்டர்நெட்டில் Batman கதைகளை பற்றி பலர் சிலாகிக்கிறார்கள். Batman மீதான அவர்களின் அபிமானம் அளப்பெரியது. அவ்வாறான விமர்சனங்கள் என்னை Batman காமிக்ஸ்களை வாசிக்கத்தூண்டின. எனக்கு "டிம் பேர்டன்" மற்றும் "கிறிஸ்டோபர் நோலன்" உருவாக்கிய Batman படங்கள் மிகவும் பிடிக்கும். எந்தவித அதிசய சக்திகளும் இல்லாத Batman உடல்பலம் மற்றும் தொழில்நுட்ப ஆற்றல் மூலமாக நீதிக்காக போராடுவது சுவாரஸ்யமானது. குறிப்பாக Dark knight திரைப்படத்தில் ஜோக்கருடன் நடைபெறும் சண்டையில் Batman அடிபட்டு மயங்கிவிழும் காட்சி புதுவிதமாக இருந்தது. அதுவே Batman படங்களை எனக்கு தேடிபார்க்க தூண்டியது. ஆனால் காமிக்ஸ் என்பது வினோதமான வஸ்து. அதிலும் அமெரிக்க காமிக்ஸ்கள் வெவ்வேறான காரணங்களுக்காக ரசிக்கப்படுகின்றன. சில நேரங்களில் கன்னாபின்னாவென்று படங்களை கொண்டுள்ள காமிக்ஸ்களும் உலகின் தலைசிறந்த காமிக்ஸ் பட்டியலில் இடம்பிடித்திருக்கின்றன. கதைசொல்லப்படும் உத்திகள், வித்தியாசமான காட்சியமைப்புகள், படங்கள் மூலம் கதையை கொண்டுசெல்லும் நவீன உத்திகளை கொண்ட காமிக்ஸ்கள் கொண்டாடப்படுகின்றன. இங்கு படங்கள் கதைகள் அநேக நேரத்தில் இரண்டாம் பட்சம்தான். எனக்கு இவற்றை புரிந்து கொள்ள நீண்ட காலமெடுத்தது. நான் இதுவரை காலமும் வாசித்தது ஐரோப்பிய காமிக்ஸ்கள்தான். அவை ஆழமான கதையம்சமும் நேர்த்தியான சித்திர தரமும் கொண்டவை. அமெரிக்க காமிக்ஸ்களை ரசிப்பதற்கு வித்தியாசமான ரசனை நிச்சயம் தேவை. சமீபத்தில் சில அமெரிக்க காமிக்ஸ்களை வாங்கினேன். ஆனால் அவற்றை வாசிக்கும் முன்பதாக மனதை தயார்படுத்தினேன். அப்படி நான் வாசித்த மூன்று Batman காமிக்ஸ்களில் நான் ரசித்த விஷயங்களை பட்டியலிடுகிறேன்.




1. Dark knight returns

55 வயது Batman சில வருட ஓய்வுக்கு பின்னராக மறுபடியும் கொதம் நகரத்தில் உள்ள சமூக விரோதிகளுடன் மீண்டும் போராடுகிறான். அதன்போது இடம்பெறும் நிகழ்வுகள் காரணமாக அவனுக்கு சமூகவிரோதி என்ற பட்டம் கிடைக்கிறது. Batman மீதான மக்களின் செல்வாக்கினால் பொறாமையில் இருக்கும் அமெரிக்க அரசாங்கம் Supermanனிடம் Batmanஐ அழிக்க உதவுமாறு கோரிக்கை விடுக்கிறது. கடைசியாக இருவருக்கும் இடையே தூள் பறக்கும் ஒற்றைக்கு ஒற்றை சண்டை. கடைசியாக எதிர்பாராத சுவாரஸ்யமான ஒரு முடிவு.

வழமைக்கு மாறான வித்தியாசமான கதை. கதாசிரியர் பிராங் மில்லர் கதை சொல்லும் விதத்தில் பல புதுமைகளை முயற்சித்திருப்பார். ஒரு நியூஸ் சனலில் போகும் செய்திகள், பேட்டிகள் மூலமாக கதை சம்பவத்துக்கு சம்பவம் நகரும். நியூஸ் சனல் அந்நேரத்தில் உள்ள மக்களின் மனநிலையை தெளிவாக படம்பிடித்துக்காட்டும். வலிமையான வசனங்கள் இக்கதையின் உயிர்நாடி. வித்தியாசமான காட்சி அமைப்புக்கு உதாரணமாக கதையில் ஒரு கட்டத்தில் காட்சி இருளில் ஆரம்பிக்கும். நான்கு கட்டங்களில் தொடர்ச்சியாக இருள். யாரோ இருவர் கதைத்துக்கொண்டிருப்பார்கள்.
இருள் விலகும்போது வில்லனின் கையாள் ஒருவனை Batman பலமாடி கட்டடத்துக்கு மேலாக பிடித்து தொங்கபோட்டவாறு இருப்பான். வில்லனின் கண்களை Batman பொத்திவைத்திருந்ததால்தான் காட்சியின் தொடக்கத்தில் இருள் வந்தது என்பதை அறியும்போது காட்சி வடிவமைப்பை பாராட்டத்தோன்றுகிறது. இப்படியாக வெவ்வேறான புத்திசாலித்தனமான காட்சி அமைப்புகள் இருக்கின்றன. கதையை வாசிக்கும்போது Batmanஇன் மனநிலையில் வாசிப்பவர்களையும் கொண்டுசெல்கிறார் கதாசிரியர். Batman மனதில் யோசிப்பதை வசனங்கள் வெளிப்படுத்தும்போது நாங்களும் அதே மனநிலையில் பயணிக்கிறோம்.

கடைசியாக Batman உம் Supermanனும் மோதிக்கொள்ளும் காட்சிகளில் வரும் லாஜிக்குகள் சிறப்பாக இருக்கும். பலம் என்ற விசயத்தில் Batman, Supermanக்கு ஈடாகவிட்டாலும் தனது தொழில்நுட்பதிறனால் சாதிப்பதுவும் ஓரளவு யதார்த்தமான சுவாரசியம். ஆனால் இக்கதையின் படங்களை கன்னாபின்னாவென்று பிராங் மில்லர் வரைந்திருப்பார். சில நேரங்களில் நேர்த்தியில்லாத விகாரமான சித்திரங்கள் வாசிப்பை தடைசெய்கின்றன. சில படங்கள் பரவாயில்லை ரகம். இவ்வளவு காலமும் நேர்த்தியான சித்திரத்தரம்கொண்ட ஐரோப்பிய காமிக்ஸ்களை  வாசித்துவிட்டு இப்படியொரு சித்திரதரம் கொண்ட காமிக்ஸை வாசிப்பது வினோதமான அனுபவம்தான். இந்த புத்தகத்தை மூன்று வருடங்களுக்கு முன்னர் வாங்கியிருந்தாலும், சமீபத்தில்தான் வாசிக்க மனம் வந்தது. அதற்கு காரணம் அந்த சித்திரதரம்தான். ஆனால் வாசித்துமுடித்தபின்னர் அந்த புத்தகத்தில் ரசிப்பதற்கு வேறு நிறைய விஷயங்கள் இருப்பதை மறுக்கமுடியாது. ஆனால் நல்ல மனஅமைதி உள்ள மழைநாளில் வாசிப்பதற்கு மட்டுமே இவ்வாறான கதைகளை recommend செய்வேன் :).

சமீபத்தில் Coursera வழங்கும் காமிக்ஸ் தொடர்பான ஒரு Courseஇல் இந்த புத்தகம் ஒரு reference ஆக உள்ளது. காமிக்ஸில் உள்ள புதுமை உத்திகளை
விளங்கப்படுத்த இந்த காமிக்ஸ் உதாரணமாக உள்ளது.
https://www.coursera.org/course/comics


2. Batman: Year one

1980 காலப்பகுதியில் Batman மீதான மோகம் குறைந்து போவதை DC Comics நிறுவனத்தினர் உணர்ந்தனர். அதனை மேம்படுத்தும் முயற்சியாக Batmanக்கு புதிய அவதாரம் கொடுக்க முடிவுசெய்தனர். அதற்கான பணியை Frank Millerரிடம் ஏற்றுக்கொண்டார். "ப்ரூஸ் வேய்ன்" எவ்வாறு Batman ஆக மாறினான் என்பதையும், இளமையான ஜேம்ஸ் கோர்டன் கொதம் போலிஸில் இணைந்த ஆரம்ப நாட்களில் இடம்பெறும் சம்பவங்கள் என்று களைகட்டும் கதை. இது Batman எவ்வாறு உருவானான் என்பது பற்றிய கதை அல்ல. Batmanஇன் ஆரம்ப நாட்களில் அவன் எதிர்கொள்ளும் சவால்கள் செய்யும் தவறுகளை நூதனமாக ஆராயும் கதை. Batman தோன்றும் கட்டங்கள் கதையின் பாதிதான். மற்றைய அரைவாசிக்கதை ஜேம்ஸ் கோர்டனுக்காக ஒதுக்கப்பட்டிருக்கும். ஜேம்ஸ் கோர்டன் கொதம் நகரின் போலிஸ் பொறுப்பினை ஏற்றுக்கொண்டவுடன் எதிர்கொள்ளும் சவால்கள், போலிஸ்காரனாக மணவாழ்க்கையில் சந்திக்கும் நெருக்கடிகள், என்று கொஞ்சம் வித்தியாசமான தளத்தில் செல்லும்கதை. இது கூடுதலாக பெரியோர்களை மட்டுமே கவரக்கூடிய கதை. இந்த இரு கதைகளும் ஒரே நேரத்தில் நகர்த்திச்செல்லப்பட்டு ஒரு புள்ளியில் இணைக்கப்படுகின்றன.

இரு கதைகளுக்கும் வெவ்வேறான வர்ண சேர்க்கை வித்தியாசமான எழுத்துருக்களை பாவித்து வித்தியாசம் காட்டியிருப்பார்கள். ஓவியங்கள் David Mazzucchelli. நான் இதுவரை பார்த்திராத ஓவியங்கள். இவரது கோடுகள் மொத்தமானவை. ஆனால் வர்ணங்கள் மூலம் நிழல்ப்படுத்துகின்றார். கதை அநேக நேரங்களில் கொதம் நகரின் இருள் படிந்த மூலைகளிலேயே நகர்கின்றது. மொத்தமான கோடுகள் இருள் படிந்த காட்சிகளை இட்டுநிரப்ப அழகாக பொருந்துகின்றன. வர்ணசேர்க்கையின் போது பயன்படுத்தப்பட்ட நிறங்கள் புதுமையானவை. கதாசிரியர் Frank Miller தனது சகல கதைசொல்லும் திறமைகளை புத்திசாலித்தனமாக கையாண்ட இதழ். ஜேம்ஸ் கோர்டன் வரும் காட்சிகள் என்னை மிகவும் கவர்ந்தன. ஏனென்றால் அவ்வளவு யதார்த்தம். Batman சந்திக்கும் சவால்கள் அழகாக பின்னப்பட்டிருக்கும். இக்கதையில் Catwomanக்கு அறிமுகம் கிடைக்கிறது. வாசகனாக என்னால் குறை கண்டுபிடிக்கவே முடியாத இதழ். குறைந்தளவு வசனங்கள்தான் என்றாலும் வலிமைமிக்க வசனங்கள். இந்த புத்தகத்தில் 96 பக்கங்களே இருந்தன. ஆனால் இதனை வாசித்துமுடிக்க வேண்டுமென்றே நிறைய நாட்களை எடுத்துக்கொண்டேன். இந்த புத்தகம் வாசித்துமுடிந்து விட்டதை எண்ணி பிறகு வருத்தப்பட்டது வேறு கதை.

3. Long Halloween

இளவயது Batmanஇன் தொடக்ககாலத்தில் நடக்கும் கதை. முகம் தெரியாத ஒரு வில்லன் ஒவ்வொரு விடுமுறை நாளிலும் ஒரு கொலை செய்கிறான். அமெரிக்காவின் ஒவ்வொரு விடுமுறை நாளிலும் ஒவ்வொரு கொலை அரங்கேறுகின்றது. கொதம் நகரிலுள்ள பெரிய தாதாவின் எதிரிகள் மற்றும் அவனது நண்பர்கள் தொடர்ச்சியாக கொலை செய்யப்படுகின்றனர். முகம் தெரியாத யாரோ ஒருவன்தான் கொலையாளி. அவனுக்கு Holiday என்று பத்திரிகைகள் பெயர் சூட்டுகின்றன. இக்கொலைகளுக்கான காரணத்தை Batman மற்றும் கமிஷனர் ஜேம்ஸ் கோர்டன் ஆகியோர் துப்பறிகின்றனர். இதே நேரத்தில் Batman கதைகளில் வரும் வழமையான வில்லன்கள் வெவ்வேறான தருணங்களில் Batmanஉடன் மோதுகிறார்கள். இது வழமையான Batman பாணி கதையில்லை. வழமையான கதைகளில் Batman பைத்தியகார வில்லன்களுடன் கண்டமேனிக்கு மோதுவார். ஆனால் இதுவோ வித்தியாசமான சஸ்பென்ஸ் த்ரில்லர்.  இக்கதை வெளியானபோது இந்த வித்தியாசமான பாணி Batman கதை ரசிகர்களிடையே பலத்த வரவேற்பை பெற்றுக்கொடுத்தது. இக்கதையின் கதாசிரியர் "ஜெப் லோப்" Batman கதைகளில் வழமையாக வலம்வரும் வில்லன் கதாப்பாத்திரங்களை புத்திசாலித்தனமாக இக்கதையில் உள்நுழைத்திருப்பார். அந்த வில்லன் கதாப்பத்திரங்களின் வித்தியாசமான குணாதிசயங்களை அழகாக பயன்படுத்தியிருப்பார். குறிப்பாக டூ-பேஸ், பொய்சன் ஐவி போன்ற பாத்திரங்கள் கதையின் போக்கை திசைதிருப்ப உதவுகின்றன. இக்கதையில் Batman தோன்றும் காட்சியமைப்புகள் கொஞ்சம் குறைவுதான். ஆனாலும் ஒரு நல்ல சூப்பர் ஹீரோ த்ரில்லரை வாசித்த திருப்தியை தருகின்றது. கதை முழுக்க தாதாக்கள் வலம்வருகின்றனர். இந்த தாதாக்களின் உலகத்தை Dark knight திரைப்படத்திலும் பயன்படுத்தியிருப்பார்கள்.

என்னை பொறுத்தவரை கதை ஓகே ரகம்தான். ஆனால் சித்திரங்கள் ஆச்சர்யப்படுத்தும் ரகம். சித்திரங்கள் நேர்த்தியானவையோ உயிரோட்டமானவையோ அல்ல. சில நேரங்களில் ஓவியர் தனது பத்து வயது மகனிடம் தூரிகையை கொடுத்து வரையச்சொன்னாரா என்று சந்தேகம் வருகின்றது. ஆனால் அவை வரையப்பட்ட கோணங்கள் அருமையாக இருக்கும். வினோதமான கோணங்களில் ஓவியர் "டிம் சேல்" வரைந்து தள்ளியிருப்பார். ஒவ்வொரு காட்சிக்குமான வண்ணகலவை கதையின் போக்குக்கு ஏற்ப மாறுபடுகிறது. ஒரு கட்டத்தின்பின்னர் ஓவியங்களில் உள்ள நெளிவுகோடுகளை ரசிக்க பழகிகொண்டேன். வாசகர்களின் மனநிலையை கதையின் போக்குடன் ஒன்றச்செய்வதில் வண்ணக்கலவை முக்கிய பங்கு வகிக்கிறது. சித்திரங்களுக்காகவே மீண்டும் ஒருமுறை வாசிக்கவேண்டும்.

மறுமலர்ச்சியின் பின்னரான டாப் டென் காமிக்ஸ் இதழ்கள் !!

2000ம் ஆண்டுகளின் பின்னர் காமிக்ஸ் வறட்சி உருவானது. அது அமெரிக்காவில் ஏற்பட்ட Great Depressionஐ போன்றதொரு தாக்கத்தை தமிழ் காமிக்ஸ் உலகில் உருவாக்கியது. ஆனாலும் 2012 ஜனவரி comeback ஸ்பெஷலின் பின்னரான காலப்பகுதியில் லயன் காமிக்ஸ் மீண்டும் வலிமையாக உயிர்த்தெழுந்திருக்கிறது. மாதத்துக்கு 2-3 என்று இதழ்கள் தவறாமல் கிடைக்கின்றன. கனவிலும் எதிர்பார்த்திராத தரத்தில் கலரில் வந்தது எல்லோரையும் கவர்ந்தது. ஆனாலும் இதனை இலங்கையில் பெற்றுகொள்வது குதிரைகொம்பாக இருந்தது. இலங்கையில் பல முன்னணி புத்தக இறக்குமதியாளர்களும் காமிக்சை கைவிட்ட நிலையில், "கோகுலம் வாசகர் வட்டம்" என்ற காமிக்ஸ் நண்பர்களில் முயற்சியால் எங்களுக்கும் காமிக்ஸ் கிடைக்கிறது. கடந்த இரு வருடங்களில் வந்த காமிக்ஸ்களிலேயே top ten வரிசைப்படுத்தும் அளவுக்கு ஏகப்பட்ட இதழ்கள் வந்து விட்டன. ஆகவே ஒரு top ten பதிவை போடுகிறேன்.

** இன்னும் இவ்வருட இதழ்கள் எதனையும் வாசிக்கவில்லை. ஆகவே 2012 ஜனவரி முதல் 2014 டிசம்பர் வரையான இதழ்களை மட்டுமே போட்டியிட்டன.

** மறுபதிப்பு இதழ்கள் எதனையும் சேர்க்கவில்லை. ஆகவே "கார்சனின் கடந்தகாலம்", "புரட்சி தீ" போன்ற evergreen இதழ்கள் ஒதுக்க வேண்டியதாயிற்று.

** இங்குள்ள ஒவ்வொரு கதையும் ஏதோவொரு காரணத்துக்காக பிடிக்கும். விருப்பு அடிப்படையில் வரிசை படுத்தவில்லை.

** இங்கு பயன்படுத்தப்பட்டுள்ள படங்கள் ஏனைய காமிக்ஸ் நண்பர்களின் தளங்களில் இருந்து எடுக்கப்பட்டவை. அவர்களுக்கு எனது நன்றிகள் :)

ஒரு சிப்பாயின் சுவடுகளில் 

எங்களுக்கு நெருக்கமானவர்கள் காணாமல் போய்விடுவது என்றுமே தீராத வலியை ஏற்படுத்தும். சாவு ஒருநாள் வலி என்றால். "காணாமல் போய்விடுவது" என்பது பலநாள் வலி. அந்த வலியை அடிப்படையாக கொண்டு உருவாக்கப்பட்ட இந்த கதை இருவேறு காலங்களில் பின்னப்பட்டிருக்கிறது. அசுவாரசியமாக மிதவேகத்தில் தொடங்கும் கதை கொஞ்சமாக வேகமெடுக்கிறது. போக்கில் நாயகனை ரசிக்கத்தொடங்கி விடுகிறோம். ஒரு கட்டத்தில் அவனுக்கு என்ன நேர்ந்திருக்குமோ என்ற பதைபதைப்பு வாசிப்பவர்களுக்குள் தொற்றிக்கொள்கிறது. வர்ண சேர்க்கைகளும் வித்தியாசமான சித்திர முறையும் எங்களை வியட்னாம் காடுகளுக்கு அழைத்துச்செல்கின்றன. எங்கள் நாட்டில் முப்பது வருட காலமாக இருக்கும் சூழ்நிலைக்கு நெருக்கமான கதையின் கரு கதையுடன் எளிதாக ஒன்றுபடச்செய்கிறது. கதையின் முடிவில் எங்களுக்கு தெரிந்தவர்கள் யாராவது காணாமல் போய்விட்டவர்களா என்று நினைக்கதொடங்கி விடுகிறோம்.





வல்லவர்கள் வீழ்வதில்லை (டெக்ஸ் வில்லர்)

வழமையான டெக்ஸ் வில்லர் கதைகளில் டெக்ஸ் குழுவினரை வீழ்த்த முடியாத வல்லவர்களாக சித்தரிப்பார்கள். ஆனால் இந்த முறை இந்த கதையின் தலைப்பில் இருக்கும் வல்லவர்களோ வேறு. பல்வேறான வரலாற்று சம்பவங்களை கோர்த்து உருவாக்கப்பட்டிருப்பது சிறப்பு. இந்த கதையை வாசிக்கும்போது ஒருவகையில் எல்லா புரட்சி போராட்டங்களுக்கும் பொதுவான இயல்புகள் இருப்பதை காணக்கூடியதாக இருக்கிறது!!. வில்லருக்கும் "ஹட்ச்" என்பவனுக்கும் இருக்கும் நட்பு. பின்னிக்கும் ஷானுக்கும் இருக்கும் நட்பு. டோலோரஸ் - "ஹட்ச்" காதல் போன்ற மனித உணர்வுகள் கதையின் போக்கை சுவாரசியமாக்குகிறது. வசனங்களுக்காக மட்டுமே மீண்டும் ஒருமுறை வாசித்தேன். சித்திரங்களுக்காக இன்னொரு முறை வாசிக்க வேண்டும். நெருப்பினை சுற்றி அமர்ந்து ஷான் குழுவினர் உரையாடும்போது நெருப்பு வெளிச்சத்தின் உக்கிரம் கண்களில் தாண்டவமாடுவது போன்ற உயிரோட்டமான சித்திரங்கள் அற்புதம். "கார்சனின் கடந்த காலத்தின்" உயரத்தை எட்ட இனியொரு டெக்ஸ் கதை இருக்குமா என்ற என்ற சந்தேகம் எனக்கிருந்தது. அந்த உயரத்தை எட்ட முயற்சித்திருக்கிறது இந்த கதை.




என் பெயர் லார்கோ (லார்கோ வின்ச்)

லார்கோ கதைகள் வழமையான டிடெக்டிவ் பாணி கதைகளை வேறு பரிமாணத்தில் சொல்கிறது. கதாசிரியர் கதையின் போக்கிலேயே உலக பொருளாதாரம், கம்பனி நிர்வாகம், எண்ணெய் வர்த்தகம், பங்குகள், போதைவஸ்து போன்ற விடயங்களில் பாடமெடுக்கிறார். பின்னாட்களில் வந்த கதைகளை காட்டிலும் முதலாவதாக வந்த இந்த கதை ஆக்சன், த்ரில் போன்றவற்றில் தூள்பரத்தியது. ஒன்றையும் சீரியஸாக தலையில் ஏற்றிக்கொள்ளாத அலட்சிய இளைஞன்தான் இப்போதைய சூப்பர் ஸ்டார்.










லார்கோ ஆக்ஸன் ஸ்பெஷல் (லார்கோ வின்ச்)

இந்த டாப் டென்னில் இருக்கும் இரண்டாவது லார்கோவின் கதை. இந்த கதை ஒரு போதை வஸ்து நெட்வொர்க் பற்றிய த்ரில்லர். போதை வஸ்து தயாரிப்புமுறை, உலகம் முழுக்க விரவி கிடக்கும் வர்த்தக நெட்வொர்க் பற்றிய தகவல்கள் சுவாரசியம். எளிமையாக அமைந்த கிளைமாக்ஸ் சினிமாத்தனமில்லாமல் இருந்தது அருமை. என்னை பொருத்தவரை இதுவரை வந்த லார்கோ கதைகளில் மிகவும் பிடித்த கதை.







எமனின் திசை மேற்கு (Wild West Special)

சோகம் இழையோடும் எளிமையான யதார்த்தமான கௌபாய் கதை. பொருத்தமான டல்லான வர்ணங்கள் புழுதி நிறைந்த மேற்கு பகுதிக்கு வாசகர்களை அழைத்து செல்கின்றன. கிராபிக் நாவல் வரிசையில் முதலாவதாக வந்த போதே கிராபிக் நாவல் என்றாலே இப்படித்தான் இருக்கும் என்ற standards ஏற்படுத்திய இதழ்.













ஆகாயத்தில் அட்டகாசம் (ப்ளூகோட் பட்டாளம்)

ப்ளூகோட் பட்டாளத்தின் அறிமுக கதை. அமெரிக்கா உள்நாட்டு போரை பின்னணியாக கொண்ட கதையை போரடிக்காமல் நகர்த்தி செல்கிறார்கள். சீரான நகைச்சுவை வசனங்கள் முழுமையான கதைக்கரு போன்றவை சுவாரசியம். பலூன் மூலமாக வேவு பார்க்கும் முறை மூலமாக வரும் நகைச்சுவை சம்பவங்கள் அருமை.












விரியனின் விரோதி (XIII மர்மம்)

இரத்த படலத்தின் இடியாப்ப சிக்கல் கதைக்குரிய prequelஆன இந்தக்கதை ஒரு தொழில்முறை கொலைகாரனின் பார்வையில் சொல்லப்பட்டுள்ளது. இதுவரை காலமும் கொடூரமான கொலைகாரன் என்று அறியப்பட்ட "மங்கூஸின்" சிறுவயது பிராயத்திலேயே அவனுக்குள்ளே விரோதம் வளர்க்கப்படுகிறது. தொழில்முறை கொலையாளியான ஹான்சை பார்த்து அவனுக்கும் தொழில்முறை கொலையாளியாக வரவேண்டுமென்ற ஆசை வருவது யதார்த்தம். ஹான்ஸ் ஷ்ரைனரை கொலையாளியாக உருவாக்கும் காட்சிகள் சுவாரசியம். ஷ்ரைனரின் முதலாவது கொலையின் பின்னரான பதட்டம் காரணமாக தலைமுடிகள் உதிர்ந்து போகும் காட்சிகள் வாசிப்பவருக்கும் அதேவகையான பதட்டத்தை ஏற்படுத்தும்.








மேற்கே ஒரு சுட்டிப்புயல் (சுட்டி லக்கி)

நான் ஆங்கிலத்தில் Kid Luckyயின் ஒரு சாகசத்தை வாசித்திருந்தேன். அதில் இல்லாத நகைச்சுவையை தேடி ஏமாற்றமடைந்தேன். கோஸ்சின்னி எழுதாத Lucky Luke கதைகள் அவ்வளவாக எடுபடாது. போதாக்குறைக்கு ஆங்கிலம் வேறு அறுவையாக இருக்கும். இதனால் தமிழில் சுட்டி லக்கி எப்படி இருக்குமோ என்ற சந்தேகம் இருந்தது. ஆனாலும் வசனங்களில் இருந்த நகைச்சுவை கதையை தூக்கி நிறுத்தியது. எடிட்டர் விஜயன் இந்த கதைக்காக நிறைய மினக்கெட்டு நகைச்சுவை வசனங்களை உருவாக்கியதாக கூறியிருந்தார். சிறுவர்களுக்கும் உகந்ததான இந்த இதழ் சிறந்த மொழிபெயர்ப்புக்காக வெற்றி பெற்றிருப்பது சிறப்பு.




கொலை செய்வீர் கனவான்களே! (Green Manor லயன் All New Special)

புராதன காலம் தொட்டு மனிதன் மனதில் இருக்கும் தீய எண்ணங்களான குரோதம், வன்மம், பழிக்கு பழி போன்ற இயல்புகளை அடிப்படையாக கொண்ட சிறுகதைகளின் தொகுப்புத்தான் Green Manor. வினோதமான கார்ட்டூன் பாணியிலான சித்திரம் மூலம் 100% சீரியசான விஷயத்தை சொல்ல முயற்சித்திருப்பது புதுமை. சில கதைகள் எழுத்தாளரின் புத்திசாலித்தனத்தை பிரதிபலிக்கிறது. புராதன நெடி வீசும் தமிழ் மொழிபெயர்ப்பு பத்தொன்பதாம் நூற்றாண்டு கதைக்களனுக்கு எங்களை இட்டுச்செல்வதில் வெற்றிபெறுகிறது. கோயில்கடை குமரன் அண்ணாவுடன் ஒரு நாள் கதைக்கும்போது Green Manor கதைகளில் ரசித்தவற்றை பற்றி கூறி மகிழ்ந்தார். அவருடன் கதைத்தபின்னர் மீண்டும் ஒருமுறை "ஜான் ஸ்மித்" கதையை வாசித்தேன். அந்த கதையில் "ஜான் ஸ்மித்" என்பவன் பல கொலைகளுக்காக தேடப்படுகிறான். கொலையை துப்பு துலக்கும் இன்ஸ்பெக்டரே சரணடைய வெவ்வேறான காரணங்களுக்காக வெவ்வேறான நபர்களால் நிகழ்த்தப்படும் கொலைகள் நிறுத்தப்படுகின்றன. கடைசியாக கொலைசெய்ய திட்டமிட்டிருந்த ஆசாமி "ஜான் ஸ்மித்" என்று எழுதப்பட்டிருந்த பேப்பர் துண்டை எறியும் கட்டம் கதைக்கு சரியான முடிவை தருகிறது.





வானமே எங்கள் வீதி

இரண்டாம் உலகப்போரை மையமாக வைத்து பல கதைகள் வந்திருக்கின்றன. இந்த கதை விமானங்கள் மூலமாக இடம்பெற்ற தாக்குதல்களை பின்புலமாக கொண்டு அமைக்கபட்ட இந்த non-linear கதை ஏனைய உலகப்போர் கதைகளில் தனித்திருக்கிறது. இரு வேறான காலங்களில் நகர்கின்ற யூகிக்க முடியாத இந்த கதையின் கதையின் போக்கு ஒருவித ஆர்வத்தை மனதில் தோற்றுவிக்கிறது. அடுத்து கதை எப்படி போகுமோ என்ற சுவாரசியம் இங்குள்ள வேறு எந்த கதையும் எனக்கு ஏற்படுத்தவில்லை என்பதே உண்மை.









11th Man: நம்முடைய டைலன் டாக் - அந்திமண்டலம்

டைலன் டாக் முதல் பத்து இடங்களை சின்ன வித்தியாசத்தில் பிடிக்க தவறுகிறார். ஆனாலும் அவரது அறிமுக கதை வித்தியாசமான கதைகளனால் சுவாரசியம் தருகிறது. ஆனாலும் கதையின் தொடக்கத்தில் இருந்த சுவாரஸ்யம் பின்னர் கொஞ்சம் குறைந்து போவதுதான் ஒரே குறை. நேர்த்தியான சித்திரங்களுக்காக இன்னொருமுறை வாசிக்க வேண்டும்.










** உங்களுடைய டாப் டென் இதழ்கள் வேறுவிதமாக இருந்தாலோ உங்களுடைய favorites புறக்கணிக்கப்பட்டாலோ பின்னூட்டத்தில் தெரிவிக்கலாம்.

ஐஸ்பெர்க் காமிக்ஸ் இலங்கையில் ஒரு தமிழ் காமிக்ஸ்

வருடம் 2005. மணி இரவு 2030. யன்னலை திறந்தாலும் காற்று வரமறுக்கின்ற, வழமைக்கு சற்றும் மாறாத வெக்கையான கொழும்பு இரவு. வெளியே பிரதான வீதியில் செல்லும் வாகனங்களின் ஒலிக்கு எனது மூளை இசைவாக்கமடைந்திருந்ததால் எதையுமே கண்டுகொள்ளாது java notesஐ பார்த்துக்கொண்டிருந்தேன். நான் அப்போது ஆங்கிலத்தில் இருக்கும் notesஐ தமிழ்ப்படுத்தி மூளையில் ஏற்றும் போராட்டத்தின் நடுவிலிருந்தேன். அப்போது வீட்டு calling bell அடித்தது. அது அண்ணாதான். அவன் calling bellஐ அடிக்கும்முறையை வைத்தே கண்டுபிடித்துவிடலாம். வழமையாக பதினோரு மணிக்கு வேலை முடிந்து வரும் அவனுக்கு எட்டரை மணி என்பது too early. வந்து சேர்ந்த முதல் வேலையா, computerஇல் Flash driveஐ போட்டான்.

"வெளியிலிருந்து வந்த முதல் வேலையா முகத்தை கழுவு. போய் computerஇல் முன்னால் பழிகிடக்கபோறியே" என்று சமையலறையிலிருந்து வந்த அம்மாவின் குரலை காதில் போட்டுக்கொள்ளவில்லை. "நான் சில french காமிக்ஸ் website pages download பண்ணிக்கொண்டு வந்திருக்கேன். அதில நம்மட இரத்த படலமும் இருக்குதுடா" என்றான். அந்த காலத்தில் "இரத்தப்படலம்" என்றாலே கைக்கெட்டாத மந்திர வார்த்தை. அதுவரை காலமும்  4, 5, 6 ஆம் பாகங்களை மாத்திரமே வாசித்திருந்ததால் முதல் பாகங்களில் என்ன நடந்திருக்குமோ இனி கதை எப்படி போகுமோ என்ற ஆர்வம் எங்கள் நினைவுகளில் ஊறி கனவுகளில் உலாவிடும். புரியாத french மொழியில் இருந்த websiteஇல் கண்கவர் படங்கள் எங்களை கனவுலகத்துக்கே இட்டுச்சென்றன. நாங்கள் இதுவரை வாசித்து சிலாகித்த comicsகளை உருவாக்கியவர்கள் இங்க்லீஷ்காரர்கள் இல்லை பிரஞ்சு-பெல்ஜியம் காரர்கள் என்ற உண்மை அப்போதுதான் புரிந்தது. Internet என்ற ஒரு விஷயம் எங்களின் காமிக்ஸ் கனவுலகங்களை மேலும் விஸ்தரிக்க உதவியது. அந்த காலங்களில் Internet access ஒரு சில இடங்களில் மட்டுமே அரிதாக கிடைக்கும். அதனால் ஒவ்வொரு நாளும் அண்ணா சந்தர்ப்பம் கிடைக்கும்போது புதிது புதிதாக comics pages கொண்டு வருவதை ஆவலுடன் எதிர்பார்த்துகொண்டிருப்பேன். அப்போதைய காலங்களில் லயன்/முத்து காமிக்ஸ்கள் அருமையாகவே வெளிவந்தன. வந்தாலும் இலங்கையில் கிடைக்காது. கடைக்காரர்களிடம் கிழமைக்கு ஒரு தடவை லயன் காமிக்ஸ் வந்து விட்டதா என்று விசாரித்து கடைக்காரர்களின் முறைப்புக்கு ஆளானோம்.

முதல் இதழின் பின்னட்டையில் இருந்த trailer

இப்படி download செய்து அவனுக்கே அலுத்து விட்டதோ என்னவோ.. ஒரு நாள் இரவு ஏதோ முடிவுடன் வீட்டுக்கு வந்தான். "டேய் நாமும் பிரஞ்சு காரனுட்ட rights எடுத்து இலங்கையில comics வெளியிடலாம்." என்றான். "ஏதோ ஜோக்கடிக்கிறான்" என்றுதான் முதல்ல யோசிச்சேன். ஆனால் அவன் சீரியஸாக Dargaud comics பதிப்பகத்தினரின் foreign rights பற்றிய தகவல்களை கொண்டுவந்திருந்தான். அவன் கண்களில் பத்து வயது பொடியனுக்குரிய ஆர்வம் இருந்ததை அவதானித்தேன். அண்ணா "காமிக்ஸ் வெளியிடுவோம் வா" என்று என்னை கேட்பது இதுதான் முதல் முறையல்ல. அவன் பதினான்கு வயதாகும்போதே Indian Ink மூலம் Cowboy comicsகளை பார்த்து வரைந்து Dictionary பார்த்து தமிழ்ப்படுத்தி கையெழுத்து காமிக்ஸ் உருவாக்குவான். அவனுக்கு கறுப்பு வெள்ளை நிழட்படுத்தி வரையும் சித்திரம் நல்லா வரும். Blazing Colts (துடிக்கும் துப்பாக்கிகள் ?? )என்றதொரு western கதையை அப்படியே பார்த்து வரைவான். யுத்த காலங்களில் பாடசாலை மூடியிருந்ததால் அவனுக்கு நிறைய நேரம் கிடைத்தது. ஆனாலும் முழுக்கதையையும் முடிக்க முன்னரே பாடசாலை மீள ஆரம்பிக்கப்பட்டதால் அந்த "கையெழுத்து" காமிக்ஸ் இடை நிறுத்தப்பட்டது. நானும் எனது பங்குக்கு எனது வயதுக்கும் தகுந்தவாறு நானே வரைந்து நிறைய படம் நாலு வார்த்தை என்று காமிக்ஸ் செய்வேன். அப்போது கற்பனைக்கு எந்த கட்டுப்பாடும் இருக்காது. ஒரு நரி சிங்கத்திடம் கடன் வாங்கி விண்கலம் அமைத்து பூமியிலிருந்து சந்திரனுக்கு போகும். அங்கிருக்கும் சில விண்வெளி மனிதர்களை சந்தித்து நட்பு வளர்க்கும். அதற்கு பிறகு ஏற்பட்ட கற்பனை வறட்சி காரணமாக அந்த கதை முடிவுக்கு கொண்டுவரப்பட்டது.

இப்படியே எங்களுக்குள் பாதியில் நின்றுபோன கனவுகளை மீண்டும் மீட்டிப்பார்க்க, அண்ணா பத்து வருடங்களுக்கு பின்னர் முடிவெடுத்திருந்தான். வெளிநாட்டு நிறுவனங்கள் அவர்களது படைப்புகளை இலங்கையில் வெளியிட அதிரி புதிரி தொகைப்பணத்தை கோரியிருந்தார்கள். அண்ணா அப்போதுதான் தொழிலை தொடங்கியிருந்தான். அவ்வளவு பணத்தை வெளிநாட்டு நிறுவனங்களுக்கு கொடுத்து புத்தகங்களை இலங்கையின் குறைந்த வாசகர் வட்டத்தில் விற்க முடியுமா என்ற கேள்வி இரண்டு பேருக்குமே இருந்தது. நான் ஒரேயடியாக "முடியாது" என்று மறுத்தேன். நான் ஒரு அவநம்பிக்கை பேர்வழி. ஆனாலும் இரத்தப்படலத்தின் முதல் பாகத்தை நாங்களே வெளியிட்டால் அதுவரை வாசிக்கும் வாய்ப்பு கிடைத்திராத முன்வரிசை பாகங்களை வாசிக்கும் வாய்ப்பு கிடைக்கும் என்ற "பேராசை" வியாபார தந்திரங்களையும், திட்டமிடல்களையும் தாண்டி முன்னிலை வகித்தது. ஆகவே அண்ணா முதல் வேலையாக Dargaud காமிக்ஸ் நிறுவனத்துடன் email தொடர்பை ஏற்படுத்தினான். வாரத்துக்கு ஒரு தடவை பக்கத்தில் இருக்கும் communicationக்கு சென்று இருநூறு ரூபாய்க்கு IDD call பிரான்சுக்கு கதைப்பான். "Dargaudஇலிருந்து யாரோ ஒரு பிரெஞ்சுக்காரன் ஜரூரா இங்கிலீஷில கதைக்கிறான். Royalty காசை கட்டினா போதும். காமிக்ஸின் மூலம் கிடைத்துவிடும்." என்றான் உற்சாகமாக. இது எவ்வளவு தூரம் போகும் என்று அவநம்பிக்கையாக "மதில் மேல் பூனை" போன்று அவதானித்து கொண்டிருப்பேன். அண்ணா சில மாதங்களுக்கு முன்பாக புதிதாக தொடங்கிய companyக்கு பெயர் ஐஸ்பெர்க். ஆகவே எங்கள் காமிக்ஸ்க்கு "ஐஸ்பெர்க் காமிக்ஸ்" என்ற நாமத்தினை சூட்டினான்.

ஒரு மாதத்திற்கு பின்னர் ஒரு நல்ல நாளில் அண்ணா கோரியிருந்த XIII, மற்றும் ப்ளுபெர்ரி கதைகளுடன் சில வேற்று கிரகங்கள் தொடர்பான Aldebran போன்ற கதைகளுக்கான sampleகள் வந்திறங்கின. எல்லாமே பிரெஞ்சு மொழியிலிருந்ததால் படம் பார்த்து கதையை புரிந்து கொள்ள முயற்சித்தேன். இரத்தப்படலத்துக்கு மட்டும் அவர்களிடம் இருந்த சில ஆங்கில பதிப்புகளை எங்கள் வசதிக்காக அனுப்பியிருந்தார்கள். அவர்களது websiteஇல் ஐஸ்பெர்க் காமிக்ஸ் இலங்கையிலிருக்கும் partners என்று list பண்ணியிருந்தது எங்களுக்கு பெரிய சந்தோசமாகவிருந்தது. ஒரு கிழமைக்குள்ளாக அண்ணா XIIIஇன் முதல் பாகத்தை என்னிடம் மொழிபெயர்க்க சொல்லியிருந்தான். ஆனால் எனது சோம்பேறித்தனத்தினாலும் படிப்பின் இடையில் நேரம் ஒதுக்க முடியாமையாலும் என்னால் அதனை செய்து முடிக்க முடியவில்லை. அதனால் அண்ணா மொழிபெயர்க்கும் வேலையையும் ஏனைய வேலைகளுடன் எடுத்துக்கொண்டான். எப்படி மொழிபெயர்ப்பது என்பதில் சில சிக்கல்கள் இருந்தன. நாங்கள் அதுவரை இந்திய காமிக்ஸ்களை மட்டுமே படித்திருந்ததால் இலங்கை தமிழில் எப்படி மொழிபெயர்ப்பது, எந்த அளவுக்கு பேச்சுத்ததமிழை நுழைப்பது என்பதில் எனக்கு ஆயிரம் குழப்பங்கள் இருந்தன. ஆனால் அண்ணா அதைப்பற்றி பெரிதாக அலட்டிக்கொள்ளாமல் கிறிஸ்மஸ் விடுமுறையில் புத்தகத்தை வெளியிடுவதற்கான முயற்சியாக இரண்டு நாள் கண்விழித்து கொஞ்சமாக இலங்கை தமிழ் வாசனையுடன் வழமையான காமிக்ஸ் பாணியில் எழுதி முடித்தான். வழமையாக இந்திய தமிழில் வரும் "டாக்டர்" என்பது "டொக்டர்" ஆனது. "பேசுதல்" என்பது "கதைத்தல்" ஆனது. எனக்கு தமிழில் மிகவும் பிடித்த வார்த்தையான "முடியாது" என்பது "ஏலாது" ஆனது. சில வசனங்கள் நீளமாக இருந்தால் Font sizeஐ கொஞ்சம் adjust செய்து வசன balloonக்குள் அடைத்தான்.

முதல் பக்கத்தின் சில பகுதிகள்

இந்த கதைக்கு என்ன தலைப்பு வைப்பது என்பது பற்றி ஒரு மணி நேரம் விவாதித்தோம். கதை முழுக்க கதாநாயகன் தனது தொலைந்த அடையாளத்தை தேடிக்கொண்டிருப்பான். அதை குறிக்கும்விதமாக "ஆளடையாளம் XIII, ஒரு தேடல்" என்று பெயரிட்டோம். லயன் காமிக்ஸ் ஆசிரியர் விஜயன் அவர்கள் எழுதும் ஹாட்லைன் போல அண்ணா "ஹாய் ரீடர்ஸ்" என்ற எடிட்டோரியல் பகுதியை எழுதினான். அதில் காமிக்ஸ் என்பது சிறுபிள்ளை சமாச்சாரமில்லை பெரியவர்களும் ரசிக்கலாம் என்பதை வலியுறுத்தியிருந்தான்.

ஹாய் ரீடர்ஸ் பகுதி

இப்படியாக 2005 மார்கழி மாதத்தின் ஒரு நல்ல மழை நாளில் ஐஸ்பெர்க் காமிக்ஸின் முதல் பிரதி எனது மேசையில் ஜம்மென்று தயாராக இருந்தது. அண்ணாவின் சின்ன வயசு கனவு நிறைவேறியது. கிட்டத்தட்ட A4 சைசில் தரமான வெள்ளை தாள்களில் அச்சிடப்பட்ட கதையின் அட்டைப்படத்தில் கதாநாயகன் XIII கோட் அணிந்து சிவனே என்றிருந்தார். ஆனாலும் தமிழ் காமிக்ஸின் பாரம்பரியமான வழுவழுப்பான அட்டைப்படம் இருக்கவில்லை. அதையும் போட்டால் விலை 100 ரூபா ஆகிவிடும் என்ற அதிர்ச்சி தகவலை கேட்டவுடன் அது வேண்டாம் என்று முடிவு செய்தோம். ஆனாலும் விலை 85 ரூபா என்று நிர்ணயிப்பதை தவிர்க்க முடியவில்லை. ஆனாலும் அந்த காலங்களில் லயன் காமிக்ஸ்கள் இலங்கையில் வெறும் நாற்பது ரூபாவுக்கே விற்றன. ஆகவே எங்கள் வெளியீடுகள் எந்தளவுக்கு வரவேற்ப்பு பெறும் என்பதில் பெரிய சந்தேகம் இருந்தது.

முதல் இதழில் வந்த coming attraction  - [Aldebran]

அண்ணாவே கொழும்பில் வழமையாக காமிக்ஸ் விற்கும் எல்லா கடைகளுக்கும் அண்ணா காமிக்சை விநியோகித்தான். குறிப்பாக பம்பலபிட்டி பிள்ளையார் கோவிலுக்கு பக்கத்தில் இருக்கும் புத்தகம் விற்கும் கடையில் 30 பிரதிகள் கொடுத்தான். ஒருவழியாக அச்சிடப்பட்ட 1000 இதழ்களில் 500க்கு அதிகமான இதழ்களை முதல்கட்டமாக விநியோகித்து முடித்தான். ஆனாலும் அவை எவ்வளவு தூரம் விற்பனையாகும் என்பது மில்லியன் டொலர் கேள்வியாக இருந்தது. கொழும்பு தவிர்ந்த ஏனைய மாவட்டங்களில் விநியோகிப்பதிலும் தொடர்புகளை ஏற்படுத்திக்கொள்வதிலும் நிறைய சிரமங்கள் இருந்தன. ஆனாலும் அண்ணா சளைக்காமல் போனில் கதைத்து இயலுமான வரைக்கும் விநியோகித்து முடித்தான். அப்போது யுத்தமா.. சமாதானமா.. என்று கணிக்கமுடியாத ஒரு இடைப்பருவம் ஆகவே யாழ்ப்பாணம் போன்ற மாவட்டங்களுக்கு சிரமத்துடனே புத்தகங்களை அனுப்பினான். எங்கட ஊர் வாசிகசாலைக்கு மறக்காமல் 2 பிரதிகள் அனுப்பினான்.

புத்தகங்களை அனுப்பி ஒரு வாரத்துக்கு பின்னர் பம்பலபிட்டி பிள்ளையார் கோவில் கடையிலிருந்து 20 புத்தகங்கள் விற்று விட்டதாக ஒரு நற்செய்தி வந்தது. ஆனாலும் சில இடங்களிருந்து விற்பனை மந்தம் என்று வயிற்றில் புளியை சில தகவல்களும் வந்து சேர்ந்தன. கொஞ்ச காலங்களில் வாசகர் கடிதங்கள் ஒவ்வொன்றாக வரத்தொடங்கின. ஒவ்வொரு கெட்ட சேதியினை தொடர்ந்தும் தெம்பூட்டும் வாசகர் கடிதம் வந்து மனதை ஆற்றியது. A4 கடதாசியில் இரண்டு பக்கம் வந்த வாசகர் கடிதம் கூட இருந்தது.

அவ்வாறான கடிதங்கள்தான் எங்களது இரண்டாம் இதழுக்கான அத்திவாரம். இரண்டாம் இதழுக்காக என்ன செய்தோம் என்பதை அடுத்த பதிவில் காண்க :) (??)

அட்டைப்படம்

2008ம் ஆண்டிலேயே நண்பர் கிங் விஸ்வா அவர்கள் ஐஸ்பெர்க் காமிக்ஸ் பற்றி எழுதிய தொடர் பதிவுகள் எங்களுக்கு மகிழ்ச்சியையும் நம்பிக்கையையும் தந்தன. அவர் அந்த பதிவிகளில் பயன்படுத்திய scan படங்களையே இப்பதிவில் பயன்படுத்தியுள்ளேன். நன்றி விஸ்வா. கிங் விஸ்வாவின் முதலாவது இதழின் விமர்சனம்

முற்றும்..

ஆனால் தேடல் தொடரும் 

தீட்டப்பட்ட புன்னகைக்கு பின்னால்... V for Vendetta

V for Vendetta படத்தை நண்பர் ஒருவரின் கடுமையான சிபாரிசு காரணமாக பார்த்தே ஆக வேண்டிய கட்டாயத்துக்கு தள்ளப்பட்டேன். இரும்புக்கரம் கொண்டு மக்களை கட்டுப்பாட்டுக்குள் வைத்திருக்க முயலும் அரசாங்கத்துக்கு எதிராக முகமூடி அணிந்த ஒருவன் புரட்சி செய்கிறான் என்பதை காட்டியிருப்பார்கள். என்னதான் வழமையான உப்புமா கதை மாதிரியாக இருந்தாலும் வழமையாக பயணிக்கும் பாதைகளில் அல்லாமல் வெவ்வேறான பாதைகளில் கதை பயணிக்கும். குறிப்பாக படத்தின் கதாநாயகன் V, அதில் வரும் பெண்ணை ஒரு முழுமையான போராளியாக மாற்ற எடுக்கும் நடவடிக்கைகள்தான் படத்தின் உயிர்நாடி. படத்தின் திரைக்கதை மற்றும் காட்சி அமைப்புகள் மூலமாக எதிர்கால இங்கிலாந்து இப்படித்தான் இருக்கப்போகிறது என்று காட்டுகிறார்கள்.

படத்தில் வரும் கதாநாயகன் V ஒருமுறையும்தானும் படத்தில் தனது முகமூடியை விலக்கவில்லை. V என்கிற ஒற்றை எழுத்துத்தான் அவனுடைய பெயர். அரசாங்க சித்ரவதை முகாமில் இவன் தங்கியிருந்த அறையின் ரோமன் இலக்கம் ஐந்து (V). சித்ரவதைகூடம் தீக்கு இரையாகும்போது அங்கிருந்து தப்பிய ஒரே கைதி V மட்டும்தான். அப்போதுதான் தான் மீண்டும் ஒருமுறை பிறந்து விட்டதாக எண்ணி பழைய பெயரை விடுத்து புதுபெயரான V என்ற பெயரை சூடி கொள்கிறான். 17 ஆம் நூற்றாண்டு காலப்பகுதிகளில் இங்கிலாந்து அரசனுக்கு எதிராக போராடி மறைந்த போராளியை போன்றதொரு முகமூடியை அணிந்து கொள்வதன்மூலமாக தனது நிலைப்பாட்டை இங்கிலாந்து அரசாங்கத்துக்கு வெளிப்படுத்துகிறான். அரசாங்கத்தின் முக்கியஸ்தர்களை கொல்வதன்மூலம் அவர்களுக்கு பெரிய தாக்கத்தினை உண்டு பண்ணி மக்களின் கண்களை திறக்கிறான். இதில் ஈவி என்றதொரு கதியற்ற பெண்ணை காப்பாற்றுகிறான் V. அவளையும் ஒரு போராளியாக மாற்றுகிறான். இப்படி போகும் கதையில் சின்ன சின்ன சுவாரசியமான சம்பவங்களை கோர்த்து படமாக்கியிருக்கிறார்கள். குறிப்பாக ஈவிக்கு "Egg in the Basket"ஐ  சிரத்தையுடன் தயாரிக்கும் காட்சி அற்புதம். என்னைவிட அண்ணாவுக்கு அது மிகவும் பிடித்திருந்தது. அதில் காட்டுவதுபோல அவனும் செய்து சாப்பிடுடா என்று
வற்புறுத்தியது வேறுகதை.

V Egg in the Basket தயாரிக்கிறான்

இந்த படத்தின் மேலதிக விவரங்களை  Wikipediaஇல் தட்டிப்பார்க்கும்போது இதன் மூலம் ஒரு காமிக்ஸ் என்பது தெரியவந்தது. Alan Moore என்பவரின் கதைக்கு David Lloyd என்பவர் தனது சித்திரம்மூலமாக கொடுத்த உயிர்தான் இந்த V for Vendetta காமிக்ஸ். Alan Mooreஇன் masterpiece. ஒரு தலை சிறந்த காமிக்ஸ் காவியம் என்றெல்லாம் புகழ்ந்து தள்ளினார்கள். என்னதான் இது ஒரு ஐரோப்பிய காமிக்சாக அடையாளம் காணப்பட்டாலும் இதனை வாசிக்கவேண்டும் என்று தோன்றவில்லை. போதாக்குறைக்கு அமெரிக்கர்களும் இதனை புகழ்ந்தது ஒருவித கிலியை ஏற்படுத்தியது.

இது நடந்து கிட்டத்தட்ட ஒரு வருடம் ஓடிவிட்டது. ஏதாவது ஐரோப்பிய காமிக்ஸ்கள் கிடைக்குமா என்று ஒரு ஆங்கில புத்தகங்கள் விற்கும் கடைக்கு சென்று நோட்டமிட்டேன். எப்போதாவது உருப்படியான Lucky Luke புத்தங்கள் கிடைக்கும். ஆனால் Goscinny கதை எழுதிய அநேக புத்தகங்கள் வாங்கி முடித்தாகி விட்டது. ஆனாலும் Lucky Luke வாங்கவேண்டும் என்றே போதை உணர்வுடன் கடைக்கு சென்றிருந்தேன். ஐரோப்பிய காமிக்ஸ்கள் ஒன்று கூட இல்லை. ஆனாலும் அமெரிக்க காமிக்ஸ்கள் நிறைய அடுக்கப்பட்டிருந்தன. அந்த காமிக்ஸ்கள் 2000, 3000, 4000 ரூபா என்று போடப்பட்டிருந்தன. அதில் எல்லாமே Super Hero கதைகள். அதில் இருக்கக்கூடிய கதைகளை பற்றி கேட்கவே வேணாம். ஒரு வரி கதைக்கு பெரிது பெரிதாக படங்கள் வரைந்து நூறு பக்கங்களை தேற்றி விடுவார்கள். Batman கதைகளை தேடிப்பார்த்து சலித்தேன். அப்போதுதான் V for Vendetta காமிக்சை பார்த்தேன். விலை 2300ரூபா என்று போட்டிருந்தது. பொலித்தீன் உரையிடப்பட்டிருந்ததால், உள்ளே திறந்து பார்க்கமுடியவில்லை. வழமை போல ஒரேயொரு பிரதி மட்டுமே இருந்தது. வாங்குவோமா இல்லையா என்று கடுமையாக யோசித்துவிட்டு பொருளாதார நிலைகளை மனக்கண்ணில் வந்து போக வாங்காமலே வீட்டை நோக்கி நடந்தேன். நீயெல்லாம் ஒரு காமிக்ஸ் ரசிகனா என்று ஒருபக்க மனசாட்சி காறி துப்பியது. ஆனால் மற்ற மனசாட்சி "குடும்பக்கஷ்டம் தெரிஞ்ச நல்ல பிள்ளை" என்று அம்மா சொல்வதைப்போலவே சொல்லி பாராட்டியது

இது நடந்து இரு வாரமாக Internetஇல் நான் google செய்த வார்த்தைகளில் "V for Vendetta" முன்னிடம் வகித்தது. கொடுக்கப்பட்ட sample படங்கள் போதுமான நம்பிக்கையை ஏற்படுத்தியது. சரி ஒருமுறை வாங்கி பார்த்து விடுவோமே! என்று தீர்மானத்துடன் ஒரு நல்ல நாளில் அலுவலக வேலையை முடித்துக்கொண்டு கடையை நோக்கி நடந்தேன். நல்லவேளையாக இருந்த ஒரு புத்தகத்தையும் ஒருவரும் வாங்கவில்லை. அதனை வாங்கிக்கொண்டு ஒருவித மனநிம்மதியுடன் Busஇல் பின்சீட்டில் ஏறி ஒரு ஆர்வத்தில் பொலீத்தீன் உறையை விலக்கி படங்களை பார்த்தேன். கொஞ்சம் மொத்தமான Newspaper தாள் போன்றொதொரு தாளில் அச்சிட்டிருந்தார்கள். பல வண்ணங்களில் படங்கள் இருந்தாலும் ஒருவித dullஆன வர்ணங்களை பயன்படுத்தியிருந்தார்கள். நமது தமிழ் காமிக்ஸ்களே தரமான தாளில் கண்ணை பறிக்கும் வர்ணத்தில் வரத்தொடங்கியிருக்கும்போது இப்படி ஒரு காமிக்ஸை 2300ரூபா கொடுத்து வாங்கினேனே என்று மனம் வருந்தினேன். ஆனால் இந்த ஏமாற்றம் தொடர்ந்ததா?

2300ரூபா கொடுத்துவிட்டோமே என்பதற்காகவே புத்தகத்தை வாசிக்கத்தொடங்கினேன். படத்தில் வந்த அதே கதைதான் ஆனால் வாசிக்க வாசிக்க காமிக்சிலிருந்து என்ன என்ன விசயங்களை அவர்களால் படங்களுக்கு எடுத்துச்செல்ல முடியாமல் போனது என்பதை உணரக்கூடியதாக இருந்தது. இக்கதைகள் தொடக்ககாலங்களில் கருப்பு வெள்ளையில் மட்டுமே வெளிவந்ததால் புதிதாக வர்ணங்களை தீட்டி மறுபதிப்பித்திருக்கிறார்கள். முதலில் பார்க்க ஒரு dullஆக இருந்தாலும் Originalஆக வந்த கறுப்பு வெள்ளை சித்திரங்களை கொஞ்சமேனும் கெடுக்காதவாறு அருமையாக வர்ணப்படுத்தியிருந்தது தெரிந்தது. V எப்போதுமே அணிந்திருக்கும் முகமூடி, ஒரு புன்னகைக்கும் போர்வீரனுடையது. இதனால் கோபமானாலும் V புன்னகைப்பான். துப்பாக்கியால் சுடப்பட்டு இரத்தம் வழியும் நேரத்திலும் அந்த புன்னகை மாறப்போவதில்லை. இது வாசிப்பவர்களுக்கு புதிய அனுபவத்தை கொடுக்கிறது. கதையில் வரும் நிகழ்வுகளுக்கு ஏற்றவாறு முகமூடியில் இருக்கும் புன்னகையை ஓவியர் சரிவரப்பயன்படுத்தியிருப்பார். David Lloydஇன்
ஓவியங்கள் இங்கிலாந்தின் இருள் நிறைந்த தெருக்களை கண்முன்னே கொண்டுவருகிறது.

ஓவியங்கள் ஒருபுறமிருக்க Alan Mooreஇன் வசனங்கள் Britishதனமான ஆங்கிலத்தில் காட்சிகளுக்கு பொருந்துகின்றன. V ஒருவிதமான நாடக பாணியிலான வசனத்தில் பேசுவது சுவாரசியம். குறிப்பாக அவன் நீதிதேவதை சிலை முன்னர் பேசும் காட்சிகள் அருமை. நீதிதேவதைக்கும் சேர்த்து தானே பேசி அவளுடன் உரையாடுவது போன்ற அவன் பேசும் வசனங்கள் அருமை. வசனங்களுக்காகவே இன்னொருமுறை வாசிக்கலாம். ஆனாலும் பின்னணி இசையில் இளையராஜா, காட்சிகளின் தேவைக்கேற்றவாறு மௌனிப்பது
போல, பொருத்தமான இடங்களில் வசனங்களற்ற படங்களே கதையை கொண்டு செல்கின்றன. ஈவியை இன்னொரு போராளியாக உருவாகும் காட்சிகள் அருமை. காமிக்ஸ்இல் இந்த காட்சியில் இருக்கும் அழுத்தம் படத்தில் இல்லை என்றே எனக்குப்பட்டது.


இதனை லயன்-முத்துவில் வெளியிட்டால் அருமையாக இருக்கும் என்று நினைக்கிறேன். தமிழில் இவற்றுக்கான வசனங்கள் சிறப்பாக இருக்கும் என்பதில் சந்தேகமில்லை. இப்படித்தான் சமீபத்தில் Frank Millerஇன் Dark Knight returns புத்தகத்தை வாங்கியிருக்கிறேன். ஓவியங்கள் கொஞ்சம் கிலியை ஏற்படுத்துகின்றன. ஆனாலும் நல்ல review கொடுத்திருக்கிறார்கள். இனித்தான் வாசிக்க வேண்டும்.

Comics Artist's creativity : for your eyes only

What makes the creativity more adorable. What makes you to watch a movie more than once. Why do you read a book, which has a well-known ending. You do all these, repeatedly when you want to get the same enjoyment again and again. But most of the time, you tend to watch/read them again to see whether you have missed something really good. When I watch the movies, first time I concentrate on the story flow, and do not care about whatever music comes out. So if I feel film is really good, I watch it for the second time to pay attention to the music director's work. My mind cannot do more than one stuff at a time, so I need watch them repeatedly to get the full enjoyment.

Comics is a way of telling a story with pictures with the dialogue ballons. Here pictures are important than the stories as adjacent pictures help the readers to imagine the situation in their virtual world. Still a good story will give a good scope for the illustrations. Comics has become more of a business, so artists will be
given a limited period of time to show their talent. So their creativity will be tested with all these external constraints. But there are Comics artists who insists on the quality than the deadlines. All my favourite Comics creators are from the Europe. They pay more attention to the minor details in the story and more importantly on the art. For instance, if you read Asterix stories, you will enjoy the dialogues for the first time. But if you check the pictures carefully there will be a small joke told with in the pictures. I always look for Dogmatix, because it will do something funny while Asterx and Obelix are on a serious discussion. These small funny pictures will help the readers keep themselves happy all through out the story. But if you take a serious Comics like XIII, pictures will tell the story alone. There will be less words within the story.

If you are a die-hard comics fan, you may want to meet your favourite Comics' artist, ask him to draw something for you. I got a similar chance when my brother Nisaharan shared me a youtube link of a 1970's french show "Tac Au Tac". In that show famous Comics artists get to gether and draw on a single canvas. They build upon each others idea. It is quite exciting to watch perform in front of us.










1) Here Uderzo (Asterix series Artist) joins with some of the fellow artists to play with their ideas. They simply develop each others' idea by drawing one by one. It is amazing to watch Uderzo draws his favourite character Obelix effortlessly.




2) Jean Giraud joins with the Neal Adams and Joe Kubert to draw his evergreen cowboy character "Bluberry". Joe Kubert has drawn for few of the Tex Willer stories as well.




3) Again Jean Giraud joins with others in a different kind of creative session.

லயன் காமிக்ஸ்! ஒரு எளிய அறிமுகம்

அப்போது எனக்கு ஏழு வயது. அக்காலங்களில் அப்பா வாழைச்சேனை கடதாசி ஆலையிலே பணிபுரிந்து வந்தார். நாங்களும் ஆலைக்கு பக்கத்திலுள்ள குடிமனையிலே வசித்து வந்தோம். வாழைச்சேனை ஒரு கிராமம். கடதாசி ஆலைக்கு பக்கத்தில் காடுபோல மரங்களால் சூழப்பட்டிருக்கும். அப்பா பணி நிமித்தமாக எப்போதாவது முந்நூறு கிலோமீட்டர்களுக்கு அப்பாலுள்ள கொழும்பு நகரத்துக்கு சென்று வருவார். அப்போது தேவையான முக்கிய பொருட்களை வாங்கி வருவார். சிறுவயதுகளில் நான் அப்பாவிடம் எனக்காக வாங்க சொல்லும் பொருள் "விளையாட்டு கார்". விதவிதமாக கார் பொம்மைகளை வாங்கி குவித்து அழகு பார்ப்பதே வாழ்க்கையின் முக்கிய குறிக்கோளாக இருந்தது. பின்னர் வயது ஏற ஏற, ஒருவழியாக கார்களின் மேல் உள்ள மோகம் குறைந்து, காமிக்ஸ் மேல் எனது மோகம் தாவியது. பிறகு என்ன! அப்பாவிடம் "ராணி காமிக்ஸ்" வாங்கி வரச்சொல்லிவிட்டு, கொழும்பிலிருந்து மதியம் வரவேண்டிய அப்பாவிற்காக காலை முதலே வாசலில் காத்திருப்பேன். அப்பா கொண்டு வரும் பெரிய பயண பொதியில் "தோடம்பழ" வாசனையடிக்கும். அந்த பொதியை திறந்தாலே வீடு முழுக்க ஒரே தோடம்பழ வாசனைதான். முன்பெல்லாம் ஆப்பிள், ஆரஞ்சு பழங்கள் கொழும்பில் மட்டுமே கிடைக்கும். அக்காலங்களில் நீங்கள் ஆப்பிள், ஆரஞ்சு பழங்கள் வாங்காமல் போனால், "கொழும்புக்கு போய் வந்திருக்கேன்" என்று நீங்கள் கற்பூரம் அடித்து சத்தியம் செய்தாலும் நம்ப மாட்டார்கள். அப்பாவும் தவறாமல் அந்த பணக்கார பழங்களை வாங்கிவருவார். காமிக்ஸ் தேவையென்றால் பயண பொதியின் அடிவரை தேடுதல் நடவடிக்கை மேற்கொள்ள வேண்டும். அவ்வாறான தேடுதலின் விளைவாக பொதியின் அடியிலே ஒரு காமிக்ஸ் சிக்கியது. அது எனக்கு மிகவும் பிடித்த மாயாவி கதை இல்லை. அதுமட்டுமல்ல அது ராணி காமிக்ஸ் கூட இல்லை. சற்று மாறுபட்ட ஒரு அட்டைப்படம். ராணி காமிக்ஸ் போலல்லாது முன்பக்கம் மட்டுமே பளபளப்பான பொலித்தீன் அட்டை இடப்பட்டிருந்தது. ஆனால் ராணி காமிக்ஸுக்கு இருபக்கமும் பளபளக்கும். பெரிய ஏமாற்றமாக இருந்தது. "லயன் காமிக்ஸ்" என்று அந்நியமான பெயரில் ஒரு காமிக்ஸ்.

"மரணத்தின் நிழலில்" என்ற அந்த இதழினை ஆர்வத்துடன் படிக்க ஆரம்பித்தேன். வசனங்கள் புரியவில்லை. படங்கள் சிறியதாக இருந்தன ஏகப்பட்ட வசனங்களுடன் கதை புரியாமல் இருந்தது. எந்த ஆர்டரில் எந்த கட்டத்தினை வாசிப்பது என்று புரியாமல், சில சமயம் திக்குமுக்காடிப்போனேன். எளிமையான ராணி காமிக்ஸுக்கு பழகிவிட்டிருந்த எனது மூளை லயன் காமிக்ஸுக்கு இசைவாக்கமடைய திணறியது. ஏனோ தானோவென்று கதையை வாசித்து முடித்தேன். ஆனால் அண்ணாவுக்கு அந்த கதை ரொம்ப பிடித்திருக்க வேண்டும். கதையை இஷ்டத்துக்கு புகழ்ந்து தள்ளினான்.

"முன்பே இந்த லயன் காமிக்ஸை ஊரில் உள்ள வாசிகசாலையில் வைத்து வாசித்திருக்கிறேன். எல்லா கதையும் சூப்பராக இருக்கும். இதில Batman கதைகூட வருமடா. படத்தினை பார்ரா. நல்லா இருக்கு இல்லே" என்பான். ஆனால் எனக்கு மட்டும் அது அவ்வளவாக பிடிபடவில்லை. அக்கதையின் ஹீரோ நார்மன் வேறு வெறி கொண்ட மூஞ்சியை வைத்துக்கொண்டு சின்னப்பயலான என்னை பயம்காட்டுவார்.

இவ்வாறே எனது ரசனையில் மாற்றமின்றி காலங்கள் கடந்து சென்றன. ஒரு சில லயன் காமிக்ஸ்கள் இக்காலங்களில் என்னை வந்தடைந்தன தொலைந்தன. டெக்ஸ் வில்லரின் யதார்த்தமான சாகசமான "பழி வாங்கும் புயல்" கூட கிடைத்தது. அது கிட்டத்தட்ட 120 பக்கங்கள் கொண்ட ஒரு மெகா சைஸ் புத்தகம். இதுவரை காலமும் காமிக்ஸ் என்றால் 66 பக்கங்கள்தான் standard என்று எண்ணியிருந்தேன். முதன்முறையாகவே வாசித்து முடிக்கமுடியாமல் திணறி அப்புத்தகத்தினை வாசிப்பதையே நிறுத்தி விட்டேன். இவ்வாறான வறட்சியாக போய் கொண்டிருந்த எனது காமிக்ஸ் இலக்கிய வாழ்க்கையில் ஒளியேற்றி வைக்கும்முகமாக என் பள்ளி தோழன் செந்தூரன் ஸ்பைடரின் "சிறுபிள்ளை விளையாட்டு" என்ற சூப்பர் ஹீரோ கதையை இரவல் தந்தான். அதற்காக என்னுடைய "மாய முரசு" என்ற மாயாவியின் கதையை அவனுக்கு கொடுத்திருந்தேன். ஸ்பைடரின் வில்லத்தனமான ஆக்சனும் அவனது கடுப்பான வசனங்களும் என்னை மிகவும் கவர்ந்தன. பாக்கெட் சைஸில் வேறு இருந்த அந்த புத்தகத்தினை வாசித்த அண்ணா ஒருவித பரவசநிலையில் இருந்தான். இருவரும் அக்காலங்களில் அந்த கதையை அக்கு வேறு ஆணி வேறாக பிரித்து விமர்சித்தோம். அதன்பின்னர் ரணி காமிக்ஸ் மேலுள்ள மோகம் மெதுவாக லயன் காமிக்ஸ்/முத்து காமிக்ஸ் மேல் தாவியது. எல்லா புத்தகங்களையும் தேடித்தேடி வாசிக்க ஆரம்பித்தேன். பாதுக்காத்து வைக்காமல் விட்ட இதழ்களை எண்ணி வருந்தினேன்.. என்னை நானே திட்டித்தீர்த்தேன்..

நான் சீரியஸாக லயன் காமிக்ஸ் வாசிக்க தொடங்கி நான்கைந்து வருடங்களில் பழைய முக்கிய ஹீரோக்களின் கதைகள் குறைய ஆரம்பித்தன. நான் வாசிக்க தொடங்கிய உடனேயே லயன் காமிக்ஸ் நிறுவனத்தினருக்கு அட்டமத்து சனி தொடங்கியிருக்குமோ! என்னவோ!. லயன் காமிக்ஸின் முதன்மையான ஹீரோவான ஸ்பைடரின் கதைகளையே "காமிக்ஸ் கிளாசிக்ஸ்" reprint புண்ணியத்திலேதான் தரிசிக்க முடிந்தது. டெக்ஸ் வில்லர் அடிக்கடி வந்து உற்சாகத்தினை தக்க வைத்து கொண்டிருந்தார். "கழுகு வேட்டை" போன்ற ஒரு கதையில் வரும் அகோரமான வில்லன் என் மனதை விட்டு இன்னும் அகலவில்லை. அந்த கதையில் வரும் climaxஇல் ஒற்றைக்கு ஒற்றை துப்பாக்கி சவால் சண்டை அழகாக அமைத்திருப்பார்கள். வாசித்து முடிக்கும்போது டெக்ஸ் வில்லருக்கு மட்டுமல்ல எங்களுக்கே வியர்த்துவிடும் அளவுக்கு சூப்பர் climax. "மரண முள்" கதையில் வரும் மயிர்கூச்செறியும் "மரணமுள்கள்" ஒரு வித்தியாசமான கதை. அதன் வித்தியாச கதைகளனுக்காக பெயர் போன விஞ்ஞான கட்டுக்கதை.


90களின் இறுதியில் புதிய புதிய ஹீரோக்கள் அறிமுகப்படுத்தப்பட்டனர். சிலரை ரசிகர்கள் ஏற்றுக்கொண்டனர் சில ஹீரோக்களை பற்றி கண்டனம் தெரிவித்து விஜயன் அவர்கட்கு கடிதங்கள் பல எழுதினர். ஆனால் எனக்கும் எல்லா கதைகளும் பிடித்துபோகுமளவு ஒருவித வெறி வந்துவிட்டது. இப்போது எப்போதாவது ஆடிக்கொருமுறை ஒருசில புத்தகங்கள் வெளிவருகின்றன. ஆனாலும் பழைய காமிக்ஸ் புத்தகத்தினையும் சேர்த்து வைத்து விட்டு மீண்டும் மீண்டும் படிப்பதே ஒருவித மகிழ்ச்சியை தருகிறது. நேரம் கிடைக்கும்போது பழைய புத்தகக்கடையில் தேடுதல் வேட்டை நடத்துகிறேன்.. கிடைத்தற்கரிய காமிக்ஸ் எதாவது கிடைத்தால் சின்ன புள்ள தனமா துள்ளி குதிக்கிறேன்..

வழமை போல இப்பதிவிலுள்ள அழகான scanகளை கிங் விஷ்வாவின் tamilcomicsulagam தளத்திலிருந்தும், ஒலக காமிக்ஸ் ரசிகரின் mokkaicomics தளத்தில் இருந்தும் அனுமதியில்லாமல் சுட்டு போட்டிருக்கிறேன். என்ன செய்வது சிறுவயதில் இருந்தே பிட் அடிப்பது வழக்கமாகி விட்டது :)